【Now財經台】蘋果公司(Apple Inc.)昨晚(7日)舉行名為「Let Loose」線上發布會，新iPad正式亮相，其中，最矚目係係iPad Pro搭載最新及功能最強嘅M4晶片，Apple形容M4性能可以媲美其他大廠嘅人工智能(AI)晶片。不過，Apple股價昨晚反應十分冷靜。 潤淼資產管理董事盧志威認為，Apple股價近期回升主要受回購推動，雖然AI概念係市場焦點，但今次加入AI功能係iPad，唔係公司主要收入來源嘅iPhone，對於今年將會推出嘅iPhone 16，市場估計，銷售情況同之前差唔多，不論銷情及增長等都唔會係爆發性，所以股價表現都要等iPhone 16登場後先可以再評估到，不過，由於之前嘅回購計劃太厲害，所以股價短期應該仍會偏強。