雅虎香港體育 巴黎奧運｜三鐵伍泰龍獲港團第33張入場券 隊友余承謙：目標達成
【體路專訊】巴黎奧運三項鐵人積分周期周一（27日）截止，根據世界三項鐵人總會最新公佈的世界排名，香港「一哥」伍泰龍（Jason）確定以較多排名積分，壓過哈薩克死敵貝森巴耶夫（Ayan Beisenbayev），在扣除前3名憑世界排名出線的日本選手後，Jason得以亞洲區第1名資格進軍巴黎奧運，成為歷來第4位出線奧運的香港三項鐵人運動員，這也是香港代表團今屆奧運第33張入場券！
香港三鐵「一哥」伍泰龍25日在哈薩克布拉拜站亞洲盃本來以第4名衝線，不過因為戴頭盔跑步被取消資格，猶幸其主要競爭對手貝森巴耶夫只排11名，未能殺入三甲以獲更多積分。根據世界三項鐵人總會最新世界排名，一直領先對手的Jason憑較高排名積分壓過對手，奪得自己首張奧運入場券，貝森巴耶夫 落後31.84分飲恨。
港隊大軍已於周一晚返抵本港，今站得季軍的余承謙賽後在IG發表感受，恭喜隊友Jason拿到巴黎奧運入場券，又指港隊過去3星期的比賽戰術都是為了隊友出線奧運而設定，「3個星期連續3場比賽終於完結，我地（哋）取一勝仗！隊友Jason成功攞到巴黎奧運入場券。今場哈薩克Burabay係我地（哋）最為重要嘅一場比賽，因為三鐵嘅奧運計分cut off係下星期一（27日）， 隊友Jason係外卡位置嘅榜首，由兩個星期前第一場領先哈薩克選手（Beisenbayev ）70分被縮少至30分，一個非常非常細嘅gap，所以基本上依（呢）3場比賽，我地（哋）嘅策略都係圍繞住奧運入場券去設定。」
他指今站戰術是守住前3名：「我地（哋）目標係要防守對手進入頭3名，如果對手第三名，Long Long（伍泰龍）就要第一名，對手頭2名，我地（哋）失去奧運入場券。」余承謙又透露，比賽當時氣溫8度，官方公佈水溫15度，但是港隊自己量度水溫時卻只得5度。若根據世界三鐵總會標準，在這低溫情況下，游水項目理應直接取消，只維持陸上兩項，比賽可獲取的奧運積分也會減少25%，變相等於Jason直接取得入場券。余承謙指賽前曾多番質問賽會為何會維持三項比賽，但沒得到正面回應。
結果賽事亦因為天氣原因延遲了一小時開賽，不過游水由2圈1500米減半至1圈750米，余承謙憶述當時戰情：「到單車我地（哋）四位都成功進入First Pack，當中仲有3位哈薩克嘅選手，包括Beisenbayev以及幾位歐洲嘅運動員。單車4圈其（期）間不斷有選手突圍，直至第三圈Robin Elg突圍成功，帶走另外3位歐洲選手，至於我、Long Long （伍泰龍）以及Oscar進入被動模式 ，等3位哈薩克選手自己追番上去，我（哋）係跟係（喺）後面sit and wait，其（期）間Beisenbayev不斷叫自己隊友到前面帶車，但佢其中一位隊友因為太凍，所以自己停低咗（落車嗰隻停），得番Beisenbayev同一位佢嘅隊友合作。當下我係（喺）後面望住佢都已經筋疲力盡，不斷叫隊友上前帶車，但佢隊友都已經得番半條命，對住我地（哋）3個接近滿血嘅香港選手，加上前面4位咗突圍咗嘅運動員，佢當下嗰種無助感，跟係（喺）後面嘅我歷歷在目。」
他繼續描述戰況，指賽事尾段遇到各種狀況：「完成單車路段，落地4圈10k跑步，同突圍集團大概有1分30幾秒距離，Chase Pack得番我同Beisenbayev2個一齊跑同追。跑步係佢強項，加上始終今場比賽事關重要，當前對手排第5，所以都係play safe等佢帶頭，睇佢追唔追得番前面4位突圍嘅選手，當中包括Robin Elg，點知第1k已經見到Robin哥抽哂筋停咗係一二邊，過咗佢之後第三名嗰個又開始放慢速度。」
為了協助Jason出線，余承謙在末段不敢怠慢：「依（呢）個時候壓力落到我身上，如果我地（哋）追到第三名個選手，我就一定要衝贏佢。直到第三圈，我地（哋）追到第三名得番大約60米，我一直跟係（喺）後面，等待着機會嘅來臨。直至第三圈回程嘅時候，佢終於放慢了，機會來了，BOOM！Attack！由馬路左邊拉至右邊，全速突圍，全速跑埋餘下嘅3k番（返）到終點，第三名完成賽事。」
港隊終於達到目標，余承謙十分滿意：「今次Team Target達成，Self Target達成，由3月尾直到整個5月，一共鬥咗6場比賽，4場Full Distance+2場Sprint Distance，加埋2月尾一場係（喺）馬拉（馬來西亞）嘅熱身賽就7場，每一場都拼盡全力，依（呢）段其（期）間好多得着亦好多感受，有做得好，有做得差，有贏亦有輸，好多謝身邊有一直支持我嘅人。」
中國香港三項鐵人總會亦在社交平台發文，指「香港三項鐵人隊的運動員在面臨極端天氣挑戰的情況下，仍然表現出色，特別是伍泰龍成功獲得了巴黎奧運的參賽席位，這確實為香港隊帶來一股強大的動力。」Jason成為歷來第4位出戰奧運的香港「鐵人」，對上3人為李致和（2004、2008）、女將麥素寧（2008）及奧斯卡（2020），後者更在3年前的東京奧運以第33名創下歷來最佳名次。
此篇文章由「體路 Sportsroad」最初發表於「巴黎奧運｜三鐵伍泰龍獲港團第33張入場券 隊友余承謙：目標達成」
