【Now財經台】波司登(03998)昨日(26日)出咗業績，集團全年多賺逾43%，毛利率微升至59.6%，如果拆開睇，下半財年盈利明顯多過上半年。波司登股價今日(27日)逆市造好，一度大升8.5%，高見4.7元，如果睇返股價表現，係咪反映呢份業績畀到市場驚喜？ 艾德金融執行董事陳政深指，波司登業績可以話無懈可擊，幾條大數嘅增長都有驚喜，其中，庫存周轉日數明顯縮短，毛利率亦靠穩。對於有人挑剔波司登毛利率升幅唔大，因集團主攻二、三線中低階城市，但Ryan就話，即使呢份業績有瑕疵，但無損整體理想嘅表現。此外，波司登去年推出防曬衣，反應似乎唔錯，管理層指，今年會繼續做相關推廣，希望夏季會有產品推出，令呢項業務嘅熱度維持得更好。Ryan認為，呢個決定合理，除咗防曬衣，集團亦針對唔同市場開拓極寒系列，不過，擴闊產品線都有代價，由於防曬衣毛利率唔及羽絨，會影響毛利率增長幅度。