葡萄友：鍾意返大陸浸溫泉嘅男人 你要埋我嗰份

搵男朋友呢，寧缺忽濫，不過今時今日喺香港要搵到一個好男仔，仲要未被人私有化嘅，真係唔容易。而且好多時候女生們都會有自己一套準則，去篩選合心水嘅男士再作發展。成日話，要睇一個男人好唔好，睇佢興趣、飲食嗜好等就已經可知個大概。其實，仲有一點，就係旅行鍾意去邊玩。情境題，幻想一下，佢同一位新相識嘅A君出去第一次約會，對方斯斯文文，談吐得宜，正當你同佢傾得情投意合之際，你問：「係呢，你平時放假鍾意去邊旅行架？」對方答：「哦，無，都係珠三角，去下恩平浸溫泉咁囉，都唔使去到日本咁遠，哈哈哈。」隨時就係一片死寂，然後你話有事走先下次傾，一段戀情未曾開始已終結，因為你知道自己係接受唔到一個閒時係返珠三角浸溫泉嘅男人做你男朋友。原因？無原因，去恩平浸溫泉唔犯法，亦唔係咩唔正經，不過純感覺唔好，女仔揀男仔，都係講Feel啫！當然唔排除他日呢��男士會搵到一個欣常佢返恩平浸溫泉嘅女朋友，不過品味呢樣嘢，唔係人人接受到。除咗返珠三角浸溫泉，以下呢項興趣同樣係香港女士聽就耍手擰頭，係咪？

「我返大陸按摩。」

對自己男朋友／老公返大陸按摩，而覺得一啲介意都無嘅女人，唔係女人，已經係聖女；所以當你明知女人唔鍾意，你都堅持咁講，一係你就真係鍾意按摩到無伴終老都唔怕；一係就連女人諗咩都唔知，兩樣都係抵你無女嘅。

「我鍾意去下Clubbing。」

有啲男人唔知點解覺得識去Clubbing或者經常去飲酒係一樣優點，令人覺得佢哋成熟定覺得佢哋壞？不過喺女人眼中，你講得出呢句，等同你話「我鍾意去滾」差唔多。係人都知男人去Clubbing為咗女架啦！

「我鍾意過大海。」

除咗返大陸浸溫泉，其實過大海去澳門都唔應該周圍同人講，事關去澳門其實無咩好做，除咗飲飲食食，就係賭錢，尤其當你係話全班男仔朋友一齊去，剩係個感覺已經好唔良好！