張敬軒賭城騷 低胸裝散熱

軒仔為賭城騷訂製新戰衣,又型又涼爽。
軒仔為賭城騷訂製新戰衣,又型又涼爽。

張敬軒展開美國巡演,首站賭城拉斯維加斯及Reno已順利完成。賭城氣溫高達40度,軒仔特別訂造新歌衫大解放,揭幕時身穿的黑色馬甲Deep V開到落肚臍,另一套黑色戰衣更真空上陣兼露腰。台下女歌迷大叫「除衫」,軒仔調侃歌迷:「年代真係唔同,依家啲女仔點解會咁大聲叫人除衫?你哋對住你哋嘅男友係咪都係咁?可以當住佢面叫其他男人除衫!」

話口未完,有男歌迷就大叫「除褲」,軒仔笑說:「等我操吓先啦,我真係唔敢。今日有小朋友喺度,千祈唔好誤導咗啲小朋友,叔叔啱啱喺度晨運。」他又透露有3位廣州「老鄉」專誠接機及捧場,又送水果,他笑說:「特登攞嚟機場畀我,喺我瞓咗十幾個鐘、披頭散髮好似隻殭屍咁樣,跟住問我:『可唔可以影張相呀?』真係好體貼呀!」