【Now財經台】美國總統特朗普(Donald Trump)上任後，喺關稅方面未有即時行動，但昨日(21日)講咗會考慮向加拿大及墨西哥加關稅25%，到咗今朝(22日)就話考慮緊喺2025年2月1日加中國10%關稅，雖然未正式出手，但都睇到有呢方面嘅Plan，特朗普關稅政可能推高美國通脹嘅憂慮係咪升溫？ 「股市漁夫」創辦人莊志雄指，市場其實一早消化咗特朗普要加關稅呢個消息，不過，特朗普係生意人，唔可能一次過加得咁誇張令通脹升返，之前市場憂慮加徵關稅會加得好勁，依家變咗循序漸進咁加，留返空間比公司諗辦法紓緩問題。Lewis又話，投資者太低估貨幣政策帶來嘅影響，通脹預期會影響長期資產，睇返聯儲局喺2024年12月議息會議嘅點陣圖，預示今年減息次數只係2次，甚至可能不減反加，令一啲人工智能(AI)相關嘅股份都要跌，資金開始偏流向咗一啲安全資產。