【Now財經台】美國候任總統特朗普(Donald Trump)宣誓就任前夕，美國股匯及加密貨幣齊造好，其中，比特幣(Bitcoin)價格一度衝上10.6萬美元，雖然之後回落，但仍企穩10萬美元，係咪代表市場睇好加密貨幣喺「特朗普2.0」時代嘅表現？ 星展銀行(香港)豐盛私人客戶執行董事鄧威信指，自從特朗普當選後，「Trump Trade」都炒咗一段時間，股市及加密貨幣價格都升得急，但佢提醒，投資者仍需時觀察佢上任後有冇「大動作」，或者推一啲出人意表嘅政策，因此，估計美股會持續波動。佢又話，特朗普一向都主力為美國爭取最大利益，力谷經濟，而Bitcoin強勢反映市場有一定憧憬，不過，加密貨幣一向大幅波動，加上唔排除未來有新加密貨幣推出，Bitcoin係咪可以繼續做加密幣「一哥」，仍然係未知之數。