【Now財經台】據「股神」巴菲特(Warren Buffett)上周向美國證交會(SEC)提交嘅13F文件顯示，旗下投資旗艦巴郡(Berkshire Hathaway)上季沽清持有嘅標普500指數交易所買賣基金(ETF)。此外，據巴郡最新公布嘅季績顯示，截至去年底止，集團現金儲備再破紀錄，高達3342億美元，雖然巴菲特喺致股東的信中表明，巴郡會永遠將大部分資金投資股票，但現金水平不斷創新高，係咪反映「股神」都睇唔通美國總統特朗普(Donald Trump)回朝後，對資產市場帶嚟嘅影響，所以要睇定啲，揸返多啲Cash？ 星展銀行(香港)豐盛私人客戶執行董事鄧威信指，各方面因素都會有影響，尤其同息口有最大關係，依家美息同過往比較仍處於高位，要做到4厘以上回報亦相對容易，風險亦較低，如果投資者想「穩袋」現金，或會選擇造定期存款，加上巴菲特嘅投資理念係價值投資，但暫時好難喺美股搵到估值平嘅股份，佢又相信，當市況好轉時，「股神」應該會再大舉買貨。