【Junior・專訪】吳家鋒追風逐影十年如夢 飛人輕身上路再求突破

·10 分鐘文章

【體路 X Junior】10月初天氣酷熱依然,跑道被午後的陽光猛烈照射,泰坦地上泛起一陣熱暈。運動場外高樓林立,天際遊雲孤飛,剛好又遮去半邊太陽,在相機觀景器中的模糊與虛實間,在陰暗與日曬處的界線上,吳家鋒就在面前颯颯跑過。這條陰晴相隔的跑道,28歲的他不知跑過無數遍,他被影子追趕着,同時也在追趕前人的影子。

2010年,徐志豪在100米跑創10秒28,打破名將蔣偉洪保持10年的10秒37男子香港紀錄,那時僅得17歲的吳家鋒只作壁上觀,在一片讚嘆聲中,他心雄許諾,「我遲啲都要破。」粵語的「啲」字耐人尋味又可堪玩味,本義謂「些許」,但其實只是不定量的虛數。初出茅蘆的吳家鋒10年前平地一聲雷,2011年城運會跑10秒40奪銀,同年在港又超風速跑10秒32,然後他再入選4X100米接力隊,去盡2012年倫敦奧運、2013年遼寧全運、2014年仁川亞運,他體格上乘,人人預測假以時日他必登上香港飛人之位。

2015年,他跑出10秒39,事隔四年再創個人最佳。

2016年。

2017年,他擺脫阿基里斯腱傷患困擾,成績一舉提升至10秒31。

2018年。

2019年。

2020年。

在運動場拍攝過後,我倆轉至對面商場裡的冰室邊吃下午茶邊訪問,我們談傷患說刮痧、聊日本隊評蘇炳添,室內無間斷播著90年代流行歌,途中忽爾奏起Beyond的《大地》:

「唏噓的感慨一年年,但日落日出永沒變遷。」

日落日出了三千晝夜,時間快轉至2021年,昔日躊躇滿志的新星踏入28歲,九月他終於在香港田徑系列賽第四站跑出10秒28,平了徐志豪的舊港績。從10秒40跑至10秒28,這0.12秒不過是一眨眼的功夫,卻足足花上他超過十載時光去追來,「成10年喇終於得喇,10年都幾耐呀可?」他說罷咯咯笑起來,這笑或許是唏噓的感慨和無奈,但肯定是放下心頭大石的解脫。

吳家鋒9月跑出10秒28創香港紀錄,一償多年心願。(圖:香港田徑總會)
吳家鋒9月跑出10秒28創香港紀錄,一償多年心願。(圖:香港田徑總會)

吳家鋒心頭的重一來是「飛人」名銜。談田徑,人人總是聚焦短跑場上的疾如雷電的身影,渴求最純綷的速度,「無形中會有啲壓力,但過咗個位就釋放晒,就算冇話刻意諗,咁多堂訓練、咁多場比賽都係想跑好啫,但永遠都爭啲爭啲。」飛人的牽絆重之又重,但他形容衝線一刻瞥見電子板顯示「10秒25」(拉線前的時間),頓時感到渾身輕爽,「唔係講緊輕浮,係覺得ok喎可以放鬆去跑,知道咗自己底線未係好差,未去到要退役。」

曾經想到退役,全因傷病拖累。過去五六年阿基里斯腱輕微撕裂的痛如夢魘纏繞,先是右腳受傷,2016年年底注射過高濃度血小板血清(PRP)以為一了百了,一年過後痛楚再次叩門,「18年亞運之後最想放棄,腳又唔好,亞運接力嘅成績又超差,嗰年係最灰心,因為隻腳好差,跑每一步都好痛 ,好似就斷咁樣,諗過不如索性斷咗佢算啦。」久經治療,才剛解決右腳問題,去年左腳的傷患接踵而來,但今次他處之泰然,「我說服自己適應咗佢,傷係麻煩,但我覺得要正面啲面對,呢個『正面』唔係話吹水㗎,真係要積極去睇,搵唔同方法囉,啲人話熱敷,其實每個人唔同,所以要逐樣試。我試咗好多嘢呀,中醫叫我敷藥過夜我又敷,但都冇乜用,我原來淨係受刮痧,等佢啲血行得好啲,再食多啲膠原蛋白,同埋訓練做手段,又要夠休息。」傷病反覆來襲會否影響心理?他斷然搖頭,「傷患係好痛,但唔及跑唔到好成績嘅痛。」

2012倫敦奧運,田徑,接力
吳家鋒年少成名,以前專注接力訓練,曾與隊友征戰2012年倫敦奧運。(相片來源:港協暨奧委會)
吳家鋒(右)指2018年亞運後受傷患困擾,陷入低谷。(圖:體路資料庫)
吳家鋒(右)指2018年亞運後受傷患困擾,陷入低谷。(圖:體路資料庫)

磨劍10年,肉體的痛和成績的壓力堆疊出一層層的重負,但吳家鋒把包袱扛在肩上,自知一步一步走來絕非空白,歷練反使他越發輕省,「成績係遲咗嘅,但我得著多咗,如果我2012年、2013年就破紀錄,我未必會堅持到而家,因為得來不易先會繼續學唔同嘅嘢,起碼知道阿基里斯腱有問題會點處理,多咗呢方面嘅知識;如果一早破咗,之後對腳先出問題,我可能會就咁選擇退役,因為覺得都已經完成咗目標。」相對球類比賽要與對手較勁,短跑純屬與分秒競爭,即使多年來10秒28的門檻如海市蜃樓般似近還遠,但吳家鋒深信時間從不騙人,「我唔灰,經驗嚟㗎嘛,繼續努力囉,過唔到就係過唔到,你跑10秒3就係10秒3,就算畀你有9秒9嘅能力,但係你跑10秒3,咁你都依然都係10秒3。」

觀眾眼中的100米轉眼便過,但為求跑快0.1秒,在吳家鋒眼中卻是漫長的學習和爭戰,「睇落好簡單都係一齊衝,喂邊有咁簡單呀!好忙㗎嗰十秒。」起跑、加速、途中、衝刺,四段各有不同,換氣時機尤其講究,即使跑姿節奏拿挰得宜,起跑又曾教吳家鋒頭痛不已,「以前唔識起跑,用唔到力好頭痕,點解會咁?明明角度啱喎,好糾結,呢種辛苦反而唔係衝廿個100米嘅辛苦,身體攰你捱過今晚,聽朝最多都係攰攰哋,但係唔似得好想起好個跑,但一直都起唔到嗰種痛苦。」想起出道時年輕力壯,吳家鋒笑說「衝到尾冇問題呀,但係冇技術吖嘛」。就如眼前的菠蘿包和凍檸茶一樣,麵團須經發酵,茶底亦要一沖二焗三撞,世間事絕無一蹴而就,唯有把一點一滴的成果累積,才能拼砌出今日的突破,「好多技術嘢係要磨,個動作你磨三個月不知不覺就做到,但呢個動作只係開始,從而令下一步更加好。十年時間都有啲耐嘅,你睇落好簡單好容易,後面冇人知係用咗好多苦功同時間。」

吳家鋒被影子追趕着,同時也在追趕前人的影子。
吳家鋒被影子追趕着,同時也在追趕前人的影子。
等了足足十年才破百米港績,吳家鋒成績出爐當刻感覺「釋放」。
等了足足十年才破百米港績,吳家鋒成績出爐當刻感覺「釋放」。

我入神上了一課短跑入門,正欲喝下最後一口凍檸茶埋單之際,他若有所思開口說道:「其實我覺得我阿sir仲偉大。」吳家鋒12年前師承畢國偉,教練紅褲子出身,心懷一腔田徑熱誠兼職授徒,吳家鋒說有些教練投身田徑數十載,既有想法根深蒂固,但畢sir卻願意投放心機和時間,因材施教,與學生鑽研新技術,「最感動係佢真係會為我哋去增長短跑知識,呢樣真係好難,因為佢讀咗個牌,已經有一套睇法。有時我提出啲嘢佢唔會即刻答我,佢唔出聲,但佢真係用心聽,返去再諗過。例如星期一我講完,星期五佢會無啦啦爆一句嘢出嚟叫我點點點。」

吳家鋒平港績當日,畢sir在看台上見證徒弟追風,賽後兩人相見,第一句卻是「跑得差」,「我自己都知,所以出成績有啲驚訝,起跑係OK,但去到後面就好緊。啱啱跑完都分析咗兩樣嘢一定要改。」很多年前他對記者說過夢想挑戰港績,再破其時的10秒16中國紀錄;至今前者已達,他另外心願躋身亞運決賽,並入圍2024年巴黎奧運,唯獨中國紀錄已被蘇炳添大幅改寫,「佢跑9秒83,咁我自己跑10秒13都好吖。」

他又跟我提起一個舊夢,「我有晚夢見自己跑9秒87,嘩,好開心,真係瞓醒都仲笑緊。」你笑他痴人說夢,但幾年前誰又想過「蘇飛人」會跑出如此成績?

吳家鋒師承奧運前代表畢國偉(右)多年,感激畢sir傾盡心血授技。(相片由受訪者提供)
吳家鋒師承奧運前代表畢國偉(右)多年,感激畢sir傾盡心血授技。(相片由受訪者提供)
生涯有高有低是平常事,縱十年來兜兜轉轉,吳家鋒深信一切皆是學習。
生涯有高有低是平常事,縱十年來兜兜轉轉,吳家鋒深信一切皆是學習。

圖、文:洪量丰
原文刊登於Sportsroad Junior Issue#53

Sportsroad Junior

Sportsroad Junior》為全港首本月刊學界體育報,創刊號於2016年1月隆重出版,內容涵蓋全港各區學界體育賽事,現時派發據點超過全港200間中、小學。我們正陸續增加免費派發的學校數目,如學校有興趣訂閱本刊,請電郵至 junior@sportsroad.hk,或填寫網上訂閱表格,並留下負責老師、班級數目、所需訂閱數量等資料,我們會盡快回覆及安排,謝謝你對《Sportsroad Junior》的支持。

我們目前亦設有以下公眾派發點:油麻地百老匯電影中心太子閱讀時代書店尖沙咀YMCA會員服務部修頓室內場館票務處麥花臣室內場館九龍灣Mega Ice元朗區體育會沙田體育會大埔體育會北區體育會荃灣球星羽毛球專門店,數量有限,派完即止。另外,我們亦有個人訂閱服務,詳情可按此瀏覽。

此篇文章由「體路 Sportsroad」最初發表於「【Junior・專訪】吳家鋒追風逐影十年如夢 飛人輕身上路再求突破

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能