【十三短打】曼城曼聯……差個字啫

·2 分鐘文章

【Now Sports】十三唔係,但身邊就有唔少曼聯躉朋友,短短一日間完全感受到佢哋由憂變喜嘅情緒起伏。C朗回歸喎,係咪恍如隔世?
撰文:球十三「跪求唔好呀~」「唔信偶像會咁做……」「拉去打靶啦!」都話英超場內場外都好睇過戲,大半日前人人仲講緊基斯坦奴朗拿度(Cristiano Ronaldo)會加盟曼城,而以上呢啲都係唔夠一日前,聽到曼聯躉嘅心聲。坦白,我哋體育傳媒人都寫定啲【C朗投城】嘅稿,對應番之前【美斯入門】(最後用唔著,冇計)。

一個屈尾十,C朗係就係返曼徹斯特,不過係去咗隔籬,返母會曼聯……差個字啫,不過就差之毫釐謬以千里。我嘅曼聯躉老友開心死,球齡長嘅多謝有份做說客嘅費Sir;有自我陶醉嘅,話根本係C朗夾埋超級經理人文迪斯玩嘢,故弄玄虛畀球迷驚喜;亦有沉實嘅就話突然嚟個老將,咁之前蘇斯克查傾向重視嘅青春路線,咪走番回頭?

總之C朗回歸英超,對呢個從來受歡迎嘅聯賽當然係好大衝擊,名同利隨來,香港球迷好自然亦更留意英超。唔係踩低歐洲冠軍意大利嘅聯賽,但同我哋始終好似有啲距離,以後英超有C朗,更加唔愁冇話題。C朗,係應該屬於英超嘅。

2021年真係體育年,多大賽又多驚世轉會。「美C」之後,轉會窗下一個焦點係邊個,或者,都數到安巴比啦啩?

撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen