日本恐怖片史上最「估佢唔到」大對決《貞子VS伽椰子》

夠膽入戲院嚇到你笑！笑到你驚！

《午夜凶鈴》同《咒怨》呢兩大恐怖系列，咁多年嚟已經榨乾咗唔少人嘅膽汁。今年，日本電影人就搞搞新意思，索性玩兩大鬼后對決，炮製《貞子VS伽椰子》。片中仲會惡搞一啲嚇人情節，務求令觀眾驚住笑，笑住驚！

近日，三大主角：貞子、伽椰子同俊雄就喺日本不斷宣傳，為電影開畫做勢。眾多活動之中，最哄動應該係「猛鬼開球禮」。披頭散髮嘅貞子做投手，伽椰子擊球後跑唔郁，要著住「I Love伽椰子」嘅白面鬼仔俊雄代跑……雖然佢哋個鬼樣好驚嚇，但成件事就搞笑度十足。另外又有伽椰子同俊雄「猛鬼親子樂」，一齊去公園打韆鞦，喺櫻花樹下野餐。貞子都唔執輸，去遊樂場影咗輯同人類拍拖嘅「初戀寫真」，盡現少女「魔力」。

此外，日本市面亦有一套兩款的「女鬼面膜」開售，想扮貞子定伽椰子都冇問題，一敷就得！搞咁多嘢，片商都係想講俾大家知，《貞子VS伽椰子》係一套打破傳統嘅鬼片，大家拭目以待啦！

日版「捉鬼敢死隊」：索模山本美月X混血嫩模玉城TINA + 型男安藤政信

歷來喺《午夜凶鈴》系列、《咒怨》系列入面，同貞子、伽椰子搏鬥過嘅女星，陣容可以講得係非常豪華，包括有松島菜菜子、深田恭子、竹內結子、栗山千明、酒井法子、加護亞依、佐佐木希、石原里美、瀧本美織等，全部都係一時人氣之選。今次被選中嘅，係活躍影視界、廣告界嘅當紅索模山本美月同埋芳齡只得十八歲嘅美日混血嫩模玉城TINA。佢哋要同時對付貞子同伽椰子及俊雄，應該辛苦過以上咁多位前輩好多！好彩，都有《大逃殺》型男安藤政信幫拖，聯手組成東灜版「捉鬼敢死隊」，實行同貞子、伽椰子、俊雄大鬥法。兩個美女學生姐手姐腳去捉鬼，當中自然唔少甩碌補鑊橋段，肯定令觀眾睇到爆笑又尖叫！

你中咒、我又中咒，點樣解救？

唯有挑撥兩大鬼后 睇佢哋互鬥！

女大學生有里(山本美月 飾)因為要慳錢，諗住用二手錄影機就算。點知錄影機入面，竟然附送舊錄影帶！佢嘅同學睇完，即接到午夜電話，不久更離奇死亡！之後有里開始追查呢個死亡傳說，仲搵埋靈媒師經藏(安藤政信 飾)幫手，拆解呢個死亡詛咒。另一方面，高中女生鈴花(玉城TINA 飾)同家人搬咗入曾經係佐伯家嘅新居，從此怪事不斷發生，家人亦接連遭遇不幸。極度恐慌嘅佢，亦係搵經藏幫忙。於是，經藏、有里、鈴花，一齊捉鬼三人行；仲諗出絕世好橋，實行以毒攻毒，利用貞子對付伽椰子，然後佢哋再出手消滅剩下嘅鬼后！究竟最後係佢哋捉鬼？定係鬼捉佢哋？

資訊由熱新聞提供
原文連結: 日本恐怖片史上最「估佢唔到」大對決《貞子VS伽椰子》

更多相關內容

樂視播婚前劇作《秀麗江山之長歌行》露玄機 林心如大肚做女王 老公貼身服侍

jetsoapp
『消閒』著數優惠網 Jetsoapp.com 除了每天致力為你搜羅全港各大不同的折扣、試用、抽獎、團購等著數優惠資訊以外，還為你提供城中熱話、娛樂消閒資訊讓你隨時有話題與朋友分享。