養眼過Anson Lo？C朗絕殺除衫派福利 爆肌body男人都like

MIRROR 2個Anson：「教主」Anson Lo（盧瀚霆）同Anson Kong（AK）近期激罕半裸騷肌拍內褲廣告，引起全城熱話。不過講騷肌，C朗才是專家！這位年屆36但身材依然「弗到冇朋友」的葡萄牙巨星，周四（30日）凌晨在歐聯F組大戰再做「救世主」，於補時5分鐘上演「絕殺」，協助曼聯主場以2：1反勝維拉利爾，他入波後懶理食黃牌，再次除衫騷肌派福利，睇到球迷噴鼻血！

好多人都話C朗自戀成狂，但又所言非虛，事實上，除衫，是他踢波以外另一強項，不論球場內外都鍾意「狂曬」自己完美的body，連日前出戰歐聯前焗桑拿「悶悶地」都忍不住把半裸照「甫」上社交媒體限時動態，C朗今晨在歐聯「一個救全家」，又點會放過騷肌機會，他自己還把靚相放上 facebook及IG，配上「Ssssiiiiiiiiiimmmmm」加個手瓜起𦟌emoji，各自賺逾1百萬個like，認真厲害！

其實除了C朗，體壇其他項目亦不缺「肌肉」男神，個多前在東京奧運狂擸5面金牌的美國新「水神」積素、英國跳水王子戴利、湯加「吳剛」大旗手陶法托夫瓦，以及F1七屆世界冠軍「黑帝」咸美頓等，都勁受歡迎。