$100零用錢絕對夠用 張頴康撰長文為老婆平反
【星島日報報道】張頴康與老婆麥雅緻育有兩歲囡囡「小豆」,一家三口相當幸福。張頴康努力搲銀,麥雅緻則幫手管理家中大小事務,兼且成為財政大臣。日前兩公婆齊齊出活動,張頴康自爆成份人工上繳畀老婆,每日有「配給」$100,要儲兩日錢先買到支酒飲,更加冇得請同事食飯。有網民直指麥雅緻太嚴苛,不過張頴康在社交網大平反,感恩有老婆管理哂成頭家,更Sweet爆指「如果冇我老婆一直以嚟管理我嘅生活,依家一定仙都唔仙吓!」
張頴康在Instagram撰長文道:「最近喺一次活動中,我透露咗我每日有$100蚊零用錢!報道出咗之後,有好多人覺得我老婆好似好嚴好刻薄!其實我想同大家講,呢$100蚊只係俾我用嚟買我自己嘅野,例如紅酒,零食,所以係絕對夠用嘅!但係大家唔知道,我老婆要用我哋嘅人工,去管理哂成頭家嘅所有駛費,例如供樓、買車、入油、屋企所有雜項嗰啲乜費物費、小豆嘅幼稚園學費、一日三餐等等等等...我係完全唔需要理,全部由我老婆一個人處理哂!」
他續言:「希望大家知道,一個女人要照顧一頭家,其實係好辛苦好偉大!就算我搵幾多錢俾家用,都彌補唔到佢為咗個家嘅付出!我聽日就要到內地拍戲一個多月,冇時間陪住我老婆!希望大家喺街見到佢,唔好再叫佢加零用錢畀我喇!仲有,我好想講,如果冇我老婆一直以嚟管理我嘅生活,唔好話$100零用錢,我諗我而家一定仙都唔仙吓!」
睇更多
是日精選