【Bookmark定】2020台灣米芝蓮必食推介出爐 （台北篇）

米芝蓮貴為飲食界聖經，今年就算受疫情影響一樣如常出書，繼續成為吃貨天書。今年《台北台中米芝蓮指南2020》就有多間台灣傳統食店都入咗「推介餐廳」，台北及台中合共有75家食店入選，台北共有7家首次入選，台中則有21家。當中大部分都係地道台灣特式美食，今日先為大家重點介紹幾家台北比較低調嘅小店啦。

超過半世紀菊花麵：昶鴻麵店

台灣麵店多不勝數，昶鴻麵店就一早薄有名氣，不過之前大家嘅焦點唔係在於味道，係在於佢係歌王蕭敬騰最愛食店之一。位於萬華夜市之內嘅小店毫不起眼，但原來已開業67年，其主打「菊花麵」用上少見嘅豬嘴脥肉加上油麵，配以清甜大骨湯，由於豬嘴脥肉油花分佈均勻食落有咬口，睇落更似菊花紋狀，因此被命名菊花麵。另外一款「豬尾麵」亦值得一試，豬尾有豐富油脂，咬落超Q彈含骨膠原。兩款麵食都係賣80台幣，難怪半世紀以來都係唔少老街坊嘅食堂啦！

昶鴻麵店

地址：台北市萬華區華西街15號

營業時間：12NN至8PM（逢星期六、日休息）

50年不變老味道：源芳刈包

同樣位萬華夜市內首次入榜仲有呢間「源芳刈包」，刈包為台灣傳統食品，源芳刈包開業50年，老闆已經80歲仍然堅持傳統風味，落足料3層滷肉加酸菜，每朝自己搓刈包皮，加上自家製花生糖粉。雖然食物味道不變，不過小店2018年大裝修翻新，變得極具文青風，明顯係吸引年輕一代去食，另一好處當然係令小店感覺新淨又衛生啦。

源芳刈包

地址：台北市萬華區華西街17-2號

營業時間：12NN至10PM（逢星期一休息）

必食焢肉飯：一甲子餐飲

今次萬華夜市可謂威到盡，第三間入選嘅就係「一甲子餐飲」。由台南舉家移民嚟台北，開業十多家庭式作業小店。店內提供一系列傳統台南美食包括滷肉飯、焢肉飯、下港肉粽、碗粿等，由於味道傳統，係唔少移民台北嘅台南人用以慰藉思鄉病嘅良品。其中最多人食係焢肉飯，連台北市政府吉祥物熊讚都讚不絕口。其餘推介小食例如魚丸湯都係熱門之選，仲要全部都係平民價，抵食！

一甲子餐飲

地址：萬華區康定路79號

營業時間：9AM至7PM（逢星期六、日休息）

大舖變小舖無損味道：陳董藥燉排骨羊肉

嚴格嚟講「陳董藥燉排骨羊肉」並非首次入選米芝蓮推介（2018及2019都入選），不過佢哋上年搬舖，而搬完亦即時再獲得推介，可見其實力有保證！此店於饒河街夜市開業20多年，為夜市中元老級食店，由老店搬去附近2分鐘路程位置，但店舖細咗，同時人流比較冷清，不過無損味道，一樣吸引大量食客嚟新舖搵食。排骨湯用上大量豬骨、羊骨及中藥材燉煮，驅寒活血補中益氣，難怪每晚都大排長龍。

陳董藥燉排骨羊肉

地址：台北市八德路四段739號

營業時間：4:30PM至12:30PM