【一生一世盃】大佬孝：諗過剪河童頭

【Now Sports】演員邵仲衡是足球發燒友，世界盃觀戰回憶不少，並與很多球迷一樣，難忘巴西球星朗拿度於廿年前揚威世界盃所剪的河童頭。「一諗起世界盃，即刻諗到咩？大哨！朗拿度嗰個河童頭。」「大佬孝」不假思索就說最難忘2002年的朗拿度。「最難忘係當年決賽巴西對德國，最突出係個河童頭，嗰隊巴西係好睇，有大哨、細哨。」

被問到當年可有考慮剪朗拿度一樣的河童頭時，他截釘截鐵：「有諗過！」最終他沒有那樣做，近日倒是剪了一個日本武士頭（見圖），同樣酷爆！他表示當年以行動支持巴西，買了一件巴西波衫，而且保存到現在，而他謂在錄影廠與一班同事睇世界盃，是人生一大樂事。

談到今屆，他自然支持巴西，因喜歡森巴足球的激情，而談到冠軍心水，他亦有另一選擇：「鍾意巴西，不過都鍾意法國，隊波沉穩而且平均，估冠軍都係呢兩隊，仲有一隊阿根廷都好好睇，但近年總係甩甩漏漏，攞唔到冠軍。」

至於神射手心水，他看好新鮮出爐嘅金球獎得主：「大熟大勇，一定係法國隊嘅賓斯馬。」

【一生一世盃】，睇波回憶，當然可以係一生一世，本欄由筆者或被訪者分享這個大賽嘅睇波難忘經歷，或對今屆賽事嘅睇法。歡迎瀏覽【一齊做世界】facebook專頁，與我們團隊一齊陶醉世界盃：
https://m.facebook.com/groups/827307045372579/

下期預告：31/10
曾經採訪世界盃的老行尊，同你分享難忘回憶。