【球迷會請入】紐卡素球迷會：煞科戰打邊爐睇波

【Now Sports】紐卡素剛打敗白禮頓前4在望，相信一眾紐迷，包括香港紐卡素球迷會代表都認為超額完成。且聽會長Tammie介紹球迷會，推介未來活動，並道盡愛隊今季代表作、未來展望及最想引入的球員。Q：從你哋網站簡介睇到一句「不願承先只想啟後，做個全心為紐嘅紐迷會」，可否簡介一吓你哋球迷會？

香港紐卡素球迷會喺2020年成立，目標係透過Facebook page嘅互動，睇波同紐迷隊踢波可以group到一班香港紐迷。作為紐迷有咩風浪未見過？我哋唔想因為成績唔好就變得過份低調，唔敢認自己係紐卡素球迷，所以不願承先，最終決定同幾位好有心嘅紐迷搞呢個球迷會。除咗一般資訊外，我哋都好想將一班勞苦功高嘅職員介紹畀一班紐迷。近半年我哋派咗特派專員，喺冇英超睇嘅情況下可以專程走上紐卡素，約咗好幾位backroom staff同佢哋做咗啲唔專業嘅訪問，目的係想將佢哋嘅職務，日常生活甚至一啲鮮為人知嘅趣事，等紐迷可以了解佢哋多啲。
年齡層方面，唔算多後生仔女，始終近十年八年成績麻麻，又冇乜球星加盟，好難吸引到新紐迷加入，不過隨著收購後成績開始逆轉，相信一定會吸納到一班年輕球迷。另外，球迷會都希望同其他香港球迷會嘅page交流，例如參加球迷會聯賽，嚟緊都希望可以同其他球迷會一齊搞吓睇波活動。
團購都有搞，許可嘅情況下我都會親自出去交收，順便見下啲紐迷吹下水。不過希望官方可以改善下物流嘅情況，近年需求大咗，Castore喺運送過程出現過幾次大漏，情況仲嚴重過早幾年紐卡素條後防線。嚟緊仲有一年就完約，希望轉番間大少少嘅品牌，等運送過程可以順順利利。

Q：當初成立球迷會有冇困難？點解決？

開始搞球迷會就正正係疫情最嚴重嘅時候兼成績唔好，冇得搞睇波活動同踢波，所以好難同一班紐迷聯誼，唯一係facebook出post同大家交流吓，我同另一位幹事Ashton都會回覆每一位紐迷嘅留言。其實睇晒同回覆所有留言真係幾花功夫，但出post都係想同大家吹吓水，就咁出post有人留言但唔回覆就冇乜意思嘅。最重要係多謝一班支持球迷會嘅紐迷，每次都踴躍留言，無論係打幾隻字或者好有心寫好長篇咁討論場波，每個留言我哋都會睇同回覆。
另外亦要多謝係紐卡素Chronicle嘅資深記者John Gibson，佢好有心定時定候都會寫吓香港紐卡素球迷會嘅報道，令當地紐迷同紐卡素官方都會留意下我哋，等多啲人知道香港有一班好忠心嘅紐卡素球迷。

Q：球隊去季由一度需要護級到殺上中游，今季更長居前4，展望來季有何期望？

作為多年紐迷，近十年大部份時間處於護級位置，每年嘅期望就係下一季能夠繼續喺Now TV睇到紐卡素；至於球會轉手以及賀維執教後的確令紐卡素有穩定嘅演出，對來季嘅成績都一定正面；不過依家未知紐卡素可以參與邊一項歐洲盃賽，展望亦有不同見解：假如有幸參與歐聯嘅話，擴軍嘅軍費以及買入球員嘅質素，一定比得歐霸資格為好；當然質素愈好，球隊實力大幅提升嘅話，希望喺聯賽榜可以繼續有力競爭前6位置，畢竟紐卡素板凳深度唔夠，不敢奢望喺聯賽以及歐洲賽同時攞到好成績。到呢刻嘅排名，對於我嚟講絕對係超額完成。

Q：你哋最希望球隊來季引入邊一位或邊幾位球員？

紐卡素現時最需要一定係中場中位置嘅球員，傳得最多嘅係占士麥迪臣，的確紐卡素係需要佢嗰種創造性嘅球員喺陣中；萊比錫嘅斯保斯拉我都幾欣賞；另外需要一位體力及力型嘅球員打防守中場，就可以解放基馬尼斯，同喺拖肥嘅比利時國腳阿馬度安拿拿，同修咸頓嘅拉菲亞都可考慮。另外左閘位置都需要增強，曾傳過阿仙奴嘅迪恩尼。

Q：如果揀紐卡素今季一場代表作，會係邊一場？

要揀一場真係好難，對於我哋嚟講，贏波真係場場都係代表作。可能有紐迷會揀贏熱刺6:1嗰場，因為上半場已經入咗5球，除咗令紐迷歡喜若狂之外，其他球迷都跌晒眼鏡；但要揀一場嘅話，我會揀作客對賓福特，上半場俾對方壓住嚟踢，對手一球詐糊同兩個12碼之下輸1球返更衣室可謂執番身彩；一向換人比較保守嘅賀維大膽喺半場換入卡林威爾遜加強攻力，亦鮮有同伊薩兩位前鋒同場下效果極好，下半場一直壓住對手嚟踢最後更以2:1反勝，喺賓福特主場全取3分。

Q：如果揀球隊本季暫時最出色嘅一位，會揀邊個？

要揀出色嘅球員，好多紐迷應該會揀查比亞、祖亞寧頓同基馬尼斯，但我反而覺得朗史達夫先係最出色。早幾年佢一鳴驚人，諗住相隔多年紐卡素青訓終於有番啲作為，可惜之後表現浮浮沉沉，經常喺球場上魂遊太虛，最過份係以佢嘅表現都可以場場正選。
今季經過賀維調教後，佢終於俾鬧醒，天份唔高腳下功夫平庸，但今季當佢唔喺陣中先發現佢嘅重要性。只可惜早幾場受傷，今季應該無緣上陣，嚟緊夏天都會買人，但我都希望朗史達夫喺球隊依然佔一席位。

Q：球迷會未來有咩活動？

嚟緊5月尾香港舉行嘅港會7人賽，香港紐卡素球迷會同一班紐迷都會去現場支持，亦希望到時同其他英超球會交流吓。今次贏唔贏到冠軍係其次，反而希望呢一班幼齒未來可以成才，喺一隊有機會見到佢哋。適逢星期日踢完7人賽，夜晚就係英超煞科，我哋都會組團打邊爐然後去睇波；另外亦開始籌備緊下季季尾約埋一班香港同移居英國嘅紐卡素球迷去聖占士球場踢波，難得聖占士開放畀球迷落去踩吓草，呢個機會真係好難得，相信一班紐卡素球迷會好有興趣。

Q：可否推介一個與你們友好的本地球迷會/群組？

阿士東維拉同李斯特城。之前有同香港維拉球迷會踢過波，亦因為之前有傳過艾馬利會執教紐卡素，最終唔成事但都有留意吓維拉，易帥後成績當然有目共睹。至於李斯特城就希望佢哋可以逃出生天，下季一齊繼續係英超打拼。

相關文章：
【球迷會請入】帕爾馬球迷：我哋有咩未經歷過？
https://sports.now.com/home/other/details?id=38538818560
【球迷會請入】白禮頓球迷：好有信心進軍歐洲
https://sports.now.com/home/news/details?id=38494029616
【球迷會請入】AC米蘭球迷：歐聯入決賽一定大搞睇波
https://sports.now.com/home/other/details?id=38444516918
【球迷會請入】賓福特香港球迷會：贏曼聯4：0收穫大
https://sports.now.com/home/news/details?id=38403816700
【球迷會請入】香港多蒙特球迷：平常心睇爭霸
https://sports.now.com/home/news/details?id=38357300105
【球迷會請入】「我可能係香港唯一布力般球迷......」
https://sports.now.com/home/news/details?id=38300493733

【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】