【機場特警】「招Sir」真人大有來頭《機場特警》顧問曾多次保護中美國家領導人

無綫新劇《機場特警》喺噚晚正式出街，由楊明﹑蔡思貝﹑張振朗、湯洛雯及鄧佩儀等人主演。首集就已經有機場找換店劫案、交通意外及咖啡店店主疑遭前員工恐嚇等事件發生，可謂相當緊湊。而一班飾演機場特警嘅演員，例如何啟南、黎振燁、楊證樺及陳偉洪等人，表現非常投入角色，努力將真實情況呈現俾觀眾。唔知大家有冇發現當中有一位比較生面口嘅呢？原來呢位「招Sir」真人大有來頭。

喺劇中飾演機場特警組前總督察「招Sir」嘅黎家智（Clement），除咗為劇集客串演出之外，佢仲係劇集嘅顧問，負責教演員們飾演機場特警嘅技巧。黎家智喺美國完成大學學位後，佢就投考加入皇家香港警察，除咗曾任警司、機場特警隊主管及要員保護組（俗稱G4）之外，佢喺在職期間曾多次受命保護中美國家領導人，包括李鵬、江澤民、胡錦濤及克林頓等人。黎家智喺2015年離開警隊，並成立特種安保顧問公司。

另外，女主角蔡思貝喺劇中飾演女警辛凱晴，喺首集佢以休班女警出現，喺踩單車期間被疑犯挾持，其後疑犯即刻俾佢制服。不過喺拍攝呢個場面時發生咗小插曲，就係氣槍喺蔡思貝耳孔走火，佢噚晚就喺社交網站講返事發經過：「記得拍攝當日，氣槍在我耳孔”走火”，很痛，痛得哭了。半天聽覺都朦朦朧朧。今天 #機場特警 第一天播出，清晰的聽到你們的鼓勵，感恩，感謝！」除咗網民們留言話辛苦同心痛佢之外，同劇演員孫慧雪都有留言回覆：「我都記得！好慘豬！你好叻呀」