【十三短打】C朗4次爆喊4種心情

Portugal's forward #07 Cristiano Ronaldo reacts after his team lost the Qatar 2022 World Cup quarter-final football match between Morocco and Portugal at the Al-Thumama Stadium in Doha on December 10, 2022. (Photo by PATRICIA DE MELO MOREIRA / AFP) (Photo by PATRICIA DE MELO MOREIRA/AFP via Getty Images)
基斯坦奴朗拿度(Cristiano Ronaldo) (PATRICIA DE MELO MOREIRA via Getty Images)

【Now Sports】球場英雄地,基斯坦奴朗拿度如此這般黯然告別世界盃,甚至國際賽舞台,歷盡冷雨,今次爆喊同之前係唔同。


當完場笛一鳴,基斯坦奴朗拿度(Cristiano Ronaldo)用雙手掩面,已經眼紅紅,直到入球員通道就爆喊。十三記憶中佢喺大賽至少有4次爆喊。第一次係2004年歐國盃,19歲仔就為國出戰大賽,嶄露頭角卻親身經歷決賽輸俾希臘,喺老家里斯本受重挫,小伙子登時淚流滿面,呢種係年少氣盛嘅真性情流露。

第二次是2012年歐國盃,當時C朗大勇大熟,率葡軍勇闖4強,無奈遇上如日中天嘅狂牛西班牙,在平分春色下鬥得燦爛,需要互射12碼決生死。喺呢個殘酷遊戲,C朗被安排第5個主踢,只嘆隊友唔爭氣,未到佢操刀已敗陣。身為隊長嘅佢喺人前並沒過份悲慟,返到更衣室就徹底崩潰……呢次係唔甘心。

4年後機會重臨,呢次係決賽挑戰東道主法國。天意令呢位最渴求表現自我嘅天王巨星上半場中段就傷出。不過場個人騷由場內搬到場外,佢形同教練咁喺場邊指手劃腳,佢嘅投入似乎激發到隊友,連隊友比比都講,眾將都奮戰為C朗贏冠軍。於是佢又喊,今次係喜極而泣,開心眼淚。

今次呢?當同曼聯作個了斷,諗住專攻相信係最後一次出戰世界盃,點知發展不如預期,逐漸淪為後備,連民意都唔like佢,萬人迷地位動搖。今場喺球隊落後情況下佢後備搏殺,係有心,但無力,始終喺曼聯磋跎咗幾個月,冇狀態,再講其他「葡」友又唔掂,般奴費蘭迪斯關鍵時刻未產生作用(最後連波都斬不起)、祖奧菲力斯埋門射門粗糙,呢刻仲未成大器,當C朗眼見老友比比頭槌近門唔入,閉眼嘆息,好無奈。終於葡萄牙繼西班牙後,再被摩洛哥剝「牙」。

C朗賽後爆喊,心情可能包含過去幾個月,以至今屆賽事嘅負面情緒一次過爆晒,亦有可能係告別眼淚。對C朗鍾愛不渝嘅球迷,或者擔心佢不僅已告別曼聯、勢告別國際賽,甚至至有個講法,如果冇好嘅歸宿,呢位落泊天王仲會唔會踢落去都成問題…..

撰文:球十三
足球迷叫第十二人,冇偏愛,冷眼旁觀係十三。