【十三短打】C朗喊出嚟好啲！

【Now Sports】啱啱睇完一場極富張力同戲劇性嘅比賽，但見基斯坦奴朗拿度破涕為笑，就諗想已故嘅林振強先生嘅著作書名《又喊又笑》四字。好似C朗呢種咁執著，對自己要求咁高嘅人，喊出嚟真係好啲。

撰文：球十三

好睇嘅球賽，唔一定需要入球，葡萄牙啱啱淘汰斯洛文尼亞，有精彩埋門、41歲老將比比加時頂唔住甩轆俾人單刀，最緊要係睇到基斯坦奴朗拿度（Cristiano Ronaldo）嘅眼淚同笑容，仲有迪亞高哥斯達連救3球12碼，捱夜都抵。

葡萄牙加時獲得12碼，十三嗰刻即時諗，C朗今日頭鎚唔得罰球又唔得，咁唔順，唔知會唔會讓畀般奴費蘭迪斯操刀呢？反正分組賽都試過近門選擇唔射而傳畀般奴入波。結果當電視熒幕顯示佢之前13球12碼全中嘅數據，轉過頭就見佢大踏步準備主踢……

佢主踢前，好似之前射罰球咁又起勢唞大氣，就算咩風浪咩大場面見盡，原來一樣咁緊張。佢射得唔太差，係奧比勒捉到路；當佢宴客，即時兩眼通紅，展現悲痛舉措。忍唔住啦，嗰種失望連埋長久以嚟所承受嘅壓力，喺呢個moment，要爆啦。

佢喊，固然因為宴客，亦因為長期承受千斤重壓力。3場分組賽食白果，你估佢唔知開始有聲音叫佢讓出正選位咩？今屆幾場波見佢都拼搏肉緊，不過多次盤扭埋門都有啲力不從心，相信連球迷都為佢擔心。夠啦，唔應該再強求好似全盛期咁逢人過人、腳腳七注。

再聽佢賽後講「這一年，我沒有犯過任何一個錯誤……」就知佢對自己要求有幾高。學教練馬天尼斯賽後話齋，佢始終係一代名將，到互射12碼依然第一個負責操刀，勇！今次把握得好，再加埋有個咁擅救12碼嘅隊友，晉級啦，破涕為笑。

「唔好谷住谷住，喊出嚟好啲」，佢個包袱太重啦，今次經歷，咁樣喊一喊、鬆一鬆未嘗唔係一件好事。佢大概明白自己其實係可以犯錯，球隊唔需要佢單天保至尊，眾隊友根本有實力一齊承擔，贏波晉級。經此一戰，葡萄牙肯定士氣更高更團結，而只要佢放低包袱，輕裝上陣、優雅素淡拋棄多年建立嘅神龕，入球或者好快出現。

葡萄牙嚟緊8強對法國，C朗大戰安巴比，好睇喎。

撰文：球十三
足球迷叫第十二人，冇偏愛，冷眼旁觀係十三。