【十三短打】喜歡尼馬嗎......？

【Now Sports】世界上總有啲球員，係你會對佢愛恨分明，從來兩極冇話攞到個中庸位，啱啱榮升巴西隊史入球王嘅尼馬，大概就屬於呢類型。
撰文：球十三尼馬（Neymar）當年喺山度士初出道極速被捧為巨星，十三仲記得嗰陣喺報館開會時，建議做一個「明日球王」專題，結果俾某位編輯語帶譏諷：「佢都得？呢啲貨色......」事隔十幾年，依家睇番尼馬係咪「球王」？講真係配唔上嘅，但呢個同時勢（同代競敵唔少），或者更重要係同巴西人嘅鬥心有關。

諗到佢之前踢巴塞隆拿確係好波，2016年喊住為國家圓奧運足球金牌夢、啱啱超越已故球王比利成為森巴兵團入球王，仲有仍然保持轉會費世界紀錄......，球王談唔上，都應該配得巨星兩個字啩？尤其係巴西人，至少視佢為國家英雄。

要憎佢嘅理由係唔少，有人會覺得佢喺2018年世界盃插水插得太浮誇，又或者認定佢只愛向錢看，喺巴黎聖日耳門執流攤賺完一大筆，「𡁻完唱」話自己曾經活喺地獄。

咁講啦，插水其實係好多南美球員通病、拜金嘅更係一大籮。十三反而覺得尼馬俾人感覺幾率真，亦唔係鍾意爭嘢嘅人，從佢踢波嘅身體語言，尤其喺國家隊係好享受。

踢嘅享受，睇嘅都係。

做呢行，隨時準備好巨星退役就做專題，從來認為好似尼馬呢啲愛享受，踢波似開P多過爭嘢嘅巴西球員，隨時早過「美C」掛靴。基斯坦奴朗拿度37歲去沙特阿拉伯、美斯36歲去美國，尼馬？31歲就離開歐洲主流聯賽。都係一句：為錢冇罪（仲要有價有市至得㗎）。但求佢踢多幾年好波，與眾同樂齊開P，球迷滿足。

撰文：球十三
足球迷叫第十二人，冇偏愛，冷眼旁觀係十三。