【十三短打】入球無「門」 日落巴黎

【Now Sports】歐聯對巴黎聖日耳門嚟講，係夢想，亦猶如咒詛。
撰文：球十三PSG再次同歐洲球會終極錦標無緣，回想隊波過去十幾年不斷以銀彈換實力──曾經坐擁生成冠軍命，球員時代捧盃捧到手軟嘅伊巴謙莫域，到近年曾經英才齊集，得到美斯、尼馬同安巴比嘅「MNM」組合……，咁又點？近代最近磅一次係4年前屈居亞軍。

今屆賽事，PSG一直活喺巨星安巴比（Kylian Mbappe）臨別秋波嘅陰霾，士氣麻麻仍然盡地一煲。嚟到4強戰就算首回合作客一球敗走，大眾仍然期望安巴比喺地頭巴黎率軍逆境重生，大賽球員嘛！結果喺世界盃決賽尚且大演帽子戲法嘅佢，受制於多蒙特出色防守都幾貼服。PSG靠佢快放突破，仲有奧斯文丹比利同夏基文以快打慢，你知我知德國佬點會唔知？果然俾「蜜蜂」憑高效防守、死球組織一擊即中。

印象中，安巴比兩回合好似完全冇機會one on one。

總之，唔可以話PSG踢得差，兩回合總共44次埋門竟然都要捧蛋，而多番中柱中楣，運都冇埋時也命也（整個賽事14次中柱中楣離場尤其淒美），話地獄黑仔王冇錯，但套路屢被洞悉又係事實。或者，法甲水準較次，獨大嘅PSG磨刀機會實在唔夠。

隨住安巴比出「門」，PSG進入重組期，感覺上隊波近年再搶唔到頂尖良將，似乎隊波勢頭下滑，安歷基話來屆爭取捲土重來，怕且唔容易。

撰文：球十三
足球迷叫第十二人，冇偏愛，冷眼旁觀係十三。