【22世盃‧衫國演義】歐洲球隊篇(上)

【Now Sports】歐洲國家隊球衣,主要都係兩大運動贊助商陣營對決,一剔牌擁有英格蘭、法國、荷蘭、葡萄牙、克羅地亞及波蘭,以佢哋今屆決賽周擁有13支國家隊贊助,確實未開波已贏氣勢,法國貴為爭取衛冕球隊,自然會以安巴比作為主打球星,主場當然亦以深藍色為主,配上金色隊徽及球衣贊助商Logo,低調得嚟不失霸氣。

法國主場波衫
法國主場波衫

撰文:沙維斯達

至於白色作客球衣,更加印上多個與國家隊有關元素圖案,而一剔牌今屆決賽周球衣用上全新4D模板,以更輕更透氣嘅Dri-Fit ADV技術造衫,務求著上去更舒服。英格蘭方面,新主場球衣設計以白色為主,肩膊用上天藍色圖紋,但一剔牌此設計就遭受到唔少英格蘭球迷批評,認為國家隊一向只以白色及紅色為波衫色調,因為國旗上也只有白紅,嘲今次設計猶如熱刺主場球衣配上國家隊隊徽一樣。

英格蘭主場波衫
英格蘭主場波衫

不過,三獅作客紅色波衫設計,英球迷就非常受落,聯想到1992年U牌有領時代,更沿用深藍色領位,非常復古。

英格蘭作客波衫
英格蘭作客波衫

如無意外,基斯坦奴朗拿度今屆應該係最後一次出戰世界盃,葡萄牙球迷要更珍惜印C朗名落國家隊波衫嘅機會。新球衣以國旗紅色及綠色作設計藍圖,主場球衣用斜角套上兩隻顏色,而作客波衫就將兩色長方條紋放喺白色球衣胸口位置,主客都用上圓領,會唔會過份單調,真係睇球迷點睇。

葡萄牙波衫
葡萄牙波衫

相關文章:

【22世盃‧衫國演義】亞洲篇

https://sports.now.com/home/news/details?id=37203669996