【話題】轉戰職業僅14個月成女拳王 婚紗拳后陳衍婷首奪WBF世界金腰帶

香港女子職業拳擊運動員「婚紗拳后」陳衍婷終圓夢，奪得首條 WBF 金腰帶成世界女拳王！日前陳衍婷於泰國出戰 WBF（World Boxing Foundation）世界輕蠅量級冠軍賽，於第四回合 KO 當地女拳手 Panumad Bubpamalo，讓她首嘗世界女拳王的頭銜：「嗰個感覺我呢世都會記得！」

圖片由公關提供

陳衍婷轉戰職業賽只有 14 個月，已寫下八勝四 KO 的佳績，回望自己放棄安穩的文職工作轉做女子拳擊運動員，當中經歷無數的挑戰：「諗返自己由學拳到而家，攞晒啲積蓄去追夢，每步都唔容易，但係每次都令我成長，每次挫敗，我都會提醒自己唔好忘記初心，我已經好幸運遇到自己真正喜歡嘅事，當我拎住條金腰帶嗰陣，所有呢啲艱辛同付出都係值得嘅！」

她興奮地指宣佈勝利一刻好夢幻，陳衍婷直言不敢相信自己能夠成為世界女拳王：「個感覺真係難以言喻，到裁判高舉我雙手示意我贏咗嗰陣，個心好激動，忍唔住喊，呢刻係對我努力嘅肯定，感動、興奮又感觸，嗰個感覺我呢世都會記得！」

圖片由公關提供

由業餘賽打到職業賽，婚紗拳后陳衍婷早已身經百戰，更先後奪得四條金腰帶，但是面對是次WBF世界輕蠅量級冠軍賽，她坦言十分緊張：「賽前準備嗰陣，畀咗好大壓力自己，好焦慮，個腦不停重複比賽嘅策略同對手嘅特點，所以晚晚都瞓得唔太好。好彩有屋企人同教練、團隊嘅支持同鼓勵，再調整返自己個心態，比賽嗰陣，我叫自己乜都唔好諗，只要專注喺對手身上、聽住教練嘅指示就得，我係咁同自己講『堅持！我一定做得到！』。」

陳衍婷再次感謝家人，尤其是丈夫的支持：「我知道好難得有機會挑戰 WBF 世界冠軍嘅頭銜，只可以放棄冬至同屋企人團聚，仲話等埋我返嚟先再做冬、食湯圓。好多謝佢哋咁體諒同支持我，賽前又煮啲清淡嘢畀我食，老公仲一直睇住直播，佢哋知我贏咗都第一時間恭喜我。」

圖片由公關提供

WBF 世界級金腰帶，除了是陳衍婷在職業生涯的重要里程碑，更因為前世界重量級拳王荷里菲特（Evander Holyfield）亦曾於 WBF 奪得世界冠軍金腰帶，她說：「荷里菲特係一位傳奇拳擊手，1991 年，佢憑住技術同毅力成功奪得 WBF 金腰帶，佢係我嘅榜樣，同時亦都提醒自己要向世界展示香港人堅韌不拔嘅精神，就算喺挑戰同逆境之中，都要繼續堅持，越戰越勇！」陳衍婷並不會因此停步，她表示已定好下個目標：「希望嚟緊可以一步步走到美國拉斯維加斯 Top Rank 職業擂台，繼續展示香港女子拳擊嘅實力！」

此文章由「香港運動筆記」最初發表於 https://reurl.cc/eGMROR