MIRROR年度排名︳第6位︰Ian 陳卓賢 搞不懂點解丟失了從容
今年作品︰
單曲- DWBF / 搞不懂
劇集- 無限斜楝有限公司
吓?咩話?Ian排第6?
頭一批鏡仔單飛喎。叱咤我最喜愛男歌手五強喎。IG followers全團排第4喎。「前妻GROUP」唔少人整咗Ian爆肌攬枕喎。
論作品,Ian今年2首歌都行啱方向,輕巧嘅R&B同佢把聲十分配合,攞返唔少分數。《無限斜楝》嘅角色設定似《男排女將》魚仔,驚喜感爭少少。
MIRROR今年爆紅,所有成員表現都會被放大,排喺Ian前頭嘅隊友都有明顯進步。但係本身條件非常優秀嘅陳仔,今年嘅存在感反而好似仲低咗。
《調教你MIRROR》嘗試俾出呢個疑問嘅答案︰入行後嘅Ian非常自我保護,於是同外界嘅隔膜似乎越來越嚴重。「調教」過後會唔會有幫助?於是我睇咗啲MIRROR群體受訪片段,Ian都係繼續靠邊站。
Ian有令人睇得/聽得舒服嘅優勢,點先可以打破障礙將呢種舒適感再次展現出來?從《造星》睇到Ian嘅優點之一係學習能力超高(讀大學先學樂器!),相信佢會好快搵到答案嘅。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!