準靚媽譚凱琪孖家姐譚凱欣拍片分享入行經過 網民大讚似樣兼靚女

女神譚凱琪（Zoie）喺今年3月封盤，與拍拖8年嘅圈外男友結婚，成為幸福人妻，喺6月尾更宣布懷孕消息，真係可喜可賀呀！譚凱琪近排大多數時間都留喺屋企安胎，除咗做運動及親自煮三餐安胎之外，佢最近仲向網絡進發，喺影片分享網站開設個人頻道。而譚凱琪嘅第一條片仲邀請咗家姐譚凱欣（Nicole）一齊拍，分享佢哋嘅入行經過。

譚凱琪喺社交網站上載咗兩張同家姐嘅側面照，唔少圈中好友都有留言，例如森美：「嘩兩個女神」、陳自瑤：「兩個都咁靚咁斯文🤣🤣🤣😝😝😍😍」及沈卓盈：「側面好似樣」等等。另外，亦有唔少網民留言話好似樣同大讚佢哋好靚女。

譚凱琪及譚凱欣都係被星探發掘而入行，Zoie喺做完平面模特兒後，被小室哲哉睇中收為弟子，仲出過個人唱片。Zoie之後喺2013年再由有線轉投無綫，過檔後都有參與唔少劇集拍攝，例如《EU超時任務》、《不懂撒嬌的女人》、《大帥哥》及《降魔的2.0》等等，同樣令觀衆留下深刻印象，唔少人睇完都讚譚凱琪有樣有演技。至於譚凱欣，係行街時被星探發掘，然後喺1991年就拍攝咗檸檬茶廣告，喺廣告中扮演清純學生妹，當時迷到不少少男。譚凱欣之後仲參與唔少電影拍攝，例如《五個寂寞的心》、《新殭屍先生》及《飛虎雄心》等等。佢喺2005年下嫁朱永棠後，退出幕前並誕下兩位囡囡。