雅虎香港體育 是日噏day：落club，唔係信唔過你，我地係信唔過D狗公咋
今晚同朋友飯聚， 睇完menu叫完餸，佢急不及待已經捉住我呻：「喂啊！好嬲啊！」
「咩事咁嬲呢今次又？」我問。
「我琴晚去蘭桂坊clubbing，返到屋企同條仔嘈到拆天。佢講嚟講去，都係話擔心我。喂大佬！我咩都冇做過，又唔係去溝仔。我哋成班女仔落去relax下啫，所有人成晚圍埋一圈，無識過任何人，更加冇做啲咩對佢唔住嘅嘢。講到尾，都係佢對我無信心，根本信唔過我。」
我問：「你男朋友而家或者以前，有冇去過clubbing？」
朋友:「有啊！同我一齊少咗，但以前應該一個月都有一兩次。就係咁先嬲，我落去佢就話擔心，佢自己去又唔會嘅，我夠唔信佢啦，佢咪又係照去。」
我：「哦……咁我想問，假設你喺舞池，後面突然之間有條仔攬你腰，咁你會點做？」
朋友：「問候佢媽媽，叫佢死x開囉，我又唔係去溝仔。」
我：「咁如果之後有第二條仔，又或者三、四、五條仔，分別過嚟攬你腰，你又會點做呢？」
朋友：「逐個逐個問候佢地媽媽啦梗係。」
我：「有冇試過選擇報警？又或者因為呢啲人，離開間club？」
朋友：「咁呢啲成日發生㗎啦。報警又太誇張啦下嘛，同埋，如果咁就離開間club，咁間間都唔駛去㗎啦喎！」
我：「你一生人有無試過係街上面又或者地鐵巴士，無端端俾人攬腰？」
朋友：「冇喎，露體狂就遇過。」
我：「所以呢，你要真誠地相信我哋男人，其實我哋係真誠地相信你落clubbing並唔係打算主動溝仔又或者俾人溝。我哋絕對唔係信唔過你，但我哋絕對真係信唔過club入面D仔。
關於從後攬腰，只要有去過clubbing嘅人，都知道一晚入面係會喺dance floor不斷發生。而我哋亦都好清楚，就算啲女仔唔受溝，最多都係行開兩步，又或者直接鬧出手嘅人。
但真心，你都已經俾人攞摸咗啦，你哋又唔會真係走去追究，過半個鐘另一條仔又係咁摸落嚟，你哋又係唔會走。被抽水機會，高過喺街俾人非禮100倍（拿所以我地唔會反對你地搭地鐵架係咪先？）
所以就算你真係唔係一心落去溝仔，你都仍然係會俾陌生人非禮，仲要係好似攞正牌嗰隻咁，有人會鍾意自己女朋友俾人非禮嘅咩？咁擔心都好正常姐。」
朋友：「喂咁好唔公平啫，又唔見佢落去，會話危險？」
我：「咁呢樣野係真係唔公平架喎sorry，拿，你哋落去嗰種，叫被動地危險。男人落到去，除非你真係靚仔到痴線，又遇上了特別痴線嘅女人。否則，如果你唔做主動，打烊個一刻都未必會有人同你講一句嘢。所以男人落clubbing嗰種，叫做主動嘅危險，你唔會擔心佢俾人非禮，但你會擔心佢溝女，呢樣就真係視乎對對方有冇信心嘅表現嘞。」
朋友：「妖！唔食甜品啦一陣，你都唔係幫我嘅。」
我：「係啦。講真話正賤人。」
text by 泰兄
圖片來源：Sarthak Navjivan＠ Unsplash
