【十三短打】高普，點會係普通嘅一個？

【Now Sports】高普喺帶領利物浦爭逐四個錦標嘅時候，突然宣佈季尾離任，對利迷確係晴天霹靂。梗係，講緊係紅軍近代最出色領隊喎，一啲都唔普通嘅一個。
撰文：球十三「我請求，請給我們時間，如果我在任4年，我們會贏得一個錦標。」時光倒流2015年10月8日，當高普（Jurgen Klopp）落實執教利物浦即時為利迷開張期票，之後證明佢冇食言，呢張期票兌現。

又記得佢初上任，唔少球圈人士將佢同時任車路士領隊，即「特別的一個」摩連奴比較。「我不想形容自己，我完全是個普通人，也許『我是普通的一個』（I am the normal one）吧？」佢說時一臉蠱惑，帶啲謙卑，順便幽「特別的一個」摩連奴一默，好掂！

佢為利物浦帶嚟嘅係豐功偉業，都唔使4年就贏到歐聯，一個摩連奴喺車路士得個恨字嘅錦標；緊接一季更犀利，率紅軍圓英超夢。當時紅軍勢如破竹，坐定粒六，利迷唯一擔驚受怕係疫情令球季取消，結果上天冇咁狠心。仲記得謝幕戰後舉盃儀式，因為疫情閉門場面冷清（本港網民好抵死，形容似「亞視台慶」），但對利迷嚟講又點會冷清？嗰份翻騰熱情，都依家諗番都難止息。

多年嚟，大家見證德國人場外風趣幽默，場內嚴以律己，球隊難免有高潮起伏，但從不失強隊本色。夠膽講任何時候，冇任何球隊對利記係贏硬。利迷將會好難忘佢點樣帶領隊波一次又一次喺雙紅會打到曼聯落花流水，7:0嗰場恐怕又係有今生，冇來世。

傳奇即將躬身謝幕離場，叫四飛而將士用命，斷估到季尾會再添錦標。至於係咪真係佢所講筋疲力竭、意興闌珊、去拜仁慕尼黑定國家隊教，抑或別有內情？唔使估最遲幾個月就知，相信大家焦點放喺邊個繼任。

沙比阿朗素家陣喺利華古遜人氣高企，既係紅軍舊將，又會係我來自德甲，確有啲千呼萬喚格局。如果係順應天命，佢最好都贏埋德甲先。講到尾，當年高普染「紅」前已經係德甲冠軍教頭，係沙比轉戰英超都需要嘅威望，你估真係「普通嘅一個」就得？

撰文：球十三
足球迷叫第十二人，冇偏愛，冷眼旁觀係十三。