【十三短打】迪基亞VS麥佳亞

【Now Sports】曼聯盃賽三冠夢碎，賽後焦點肯定係「送禮」，兩大主角哈利麥佳亞同迪基亞齊齊送禮，慘不忍睹。
撰文：球十三同個球迷一齊睇波，當曼聯失完第1球，大家就迪基亞（David de Gea）定哈利麥佳亞（Harry Maguire）應該負更大責任，有啲爭拗。佢不嬲唔like「麥麥送」，自然起勢鬧佢，「麥麥送」清個波嘅時間同角度固然都麻麻，十三並唔係刻意為佢講好話，但迪基亞唔係第一日識佢，明知咁多敵將埋身，冇理由仲傳畀個控波能力弱兼唔夠速度嘅隊友，用「醫院波」嚟形容都唔啱，「墳場波」至貼切。

當隊波失信心，「送禮」嘅事自然一而再。如果話第1球係迪基亞跣「麥麥送」，咁佢同對方認真好朋友，擔綱演出「送禮」續集，寧願自己孭隻更大嘅鑊。咁講啦，如果唔係整條防線嘅守兵已經冇晒信心，慌失失，迪基亞都唔會好似BBC數據所指，追平熱刺門將羅利斯犯錯5次，齊做送禮最多嘅龍門。

要怪，就怪利辛度馬天尼斯同華拉尼傷得唔及時。

講到尾曼聯失歐霸，緊接要應付英足盃（三日後鬥白禮頓）同全力保聯賽前4。領隊坦夏以大圍角度出發，話晒成班人，冇針對兩個送禮王（鬼咩，冇得揀，之後要繼續重用佢哋），反而好欣賞基斯甸艾歷臣講出真心話：「我們失去了一點冷靜，犯了比平時更多的錯誤，整個團隊都無法趕上隊友犯的錯誤……」（詳見另文）丹麥人行事同踢法一樣瀟洒，毫無修飾，值得欣賞。

撰文：球十三
足球迷叫第十二人，冇偏愛，冷眼旁觀係十三。