【星Easy】不求女兒做醫生律師 李忠希(下)：只希望她像我一樣做個好人！

從歌手到主持、從主持到現在《再創世紀》、《跳躍生命線》兩線劇集連11月台慶劇《是咁的，法官大人》都有份演出，二十多年演藝路漸漸有起色，但是從來不易行。李忠希說有朝一日到宇喬明白，就會分享自己做人那一套：「我唔係大富大貴，但係有車有樓有個屬於自己嘅家，做人要識得滿足；我亦都唔係咩大明星，但係從來唔會計算人，做好自己，所以可以喺呢行廿幾年依家仲生存到。人生流流長，搵到興趣同目標，仲要識得堅持至得！」

生女，從此有多個小情人
李忠希七歲的時候，父親因為心臟病去世，從小到大對父親的記憶很模糊而且少之又少，養家重要、工作忙碌，還是盡可能少應酬早回家，為的就是陪在女兒身邊共同製造更多回憶：「生女好呀，真係好嗲好黐我。我仲記得佢四歲嗰陣，我去咗大陸拍嘢……都係個幾星期啫，個女一見我返嚟啲眼淚水喺對眼入面浪吓浪吓咁：『爸爸，你去咗邊呀……』真係甜到入心，成個人軟晒。宇喬受軟唔受硬，好細心好識照顧人，有時爸爸媽媽大聲小小講嘢，會叫我哋唔好嘈交，有時應酬飲多咗返屋企，佢又會斟杯水，行埋嚟叫我下次唔好飲咁多。個女一日一日咁大，我都希望做個唔係淨係識得打同鬧嘅爸爸，可以同佢做好朋友、可以互相分享人生經驗，唔好愈行愈遠。」

學習，是為了未來更多選擇
話晒爸爸唱歌出身、還曾經是叱咤生力軍銅獎，李忠希說可能女兒有遺傳、還在媽媽肚子裡時就看不少演唱會，所以也有演藝戲胞，愛唱歌跳舞和上台表演：「佢有天份，又唔怯場，將來想做啲咩我都唔會反對，希望佢可以自己選擇，最近佢又變咗，話想做警察，除暴安良喎！但係有自由度之餘，為人父適當管教都要有，好似之前學跳舞，佢好朋友唔學佢又想放棄，我就話佢聽學跳舞係佢自己揀，鍾意就要堅持，輕易放棄乜都唔會做得到……我覺得做人父母最唔應該就係攞佢同人比較，小朋友應該要鼓勵、而唔係打擊自信。學校功課雖然辛苦、爸爸媽媽唔使你考第一，但係讀書係為咗自己，今日做好啲，未來人生道路上就可以多個選擇，有權選擇，呢樣嘢最重要！」