【十三短打】C朗愛恨了斷合時

【Now Sports】好心分手、不拖不欠，基斯坦奴朗拿度同曼聯分手，並唔令人意外，而喺決賽周期間，尤其係葡萄牙準備展開世界盃征途前嚟個了斷，對任何人都有好處。走得合時。
撰文：球十三「若註定有一點苦楚，不如自己親手割破……」歌仔都有唱，基斯坦奴朗拿度（Cristiano Ronaldo）同曼聯嘅分手局面，早喺C朗受訪連番發表爆炸性言論注定，只係遲早問題。唔敢斷言萬人迷舊年夏天回歸紅魔係錯，始終喺英超入18球，有功有勞，只可以話係時間上嘅錯配。當時主帥蘇斯克查苦心經營一支後起具活力嘅大軍，向「前」行緊，會方堅持搵番個做過佢隊友，但逐漸遠離高峰嘅巨星空降，係行番轉頭，向「後」倒褪。

唔知邊個錯，起碼係時間上嘅錯。

曼聯去季前4不入固然失敗，換嚟係根本唔鍾意行巨星路線嘅坦夏，斷唔會再令球隊遷就C朗，萬人迷被投閒置散實屬必然。再拉扯落去，冇人有好處，總有人要先行一步嚟個了斷。之後發生坦夏想喺比賽垃圾時間換入C朗，C朗唔就範提早離場，已經覆水難收，大家行動上都有一個要先行，達成分手共識。

C朗何許人物！縱橫球壇甚至商界多年，當然識玩，主動搵個名嘴老友安排個訪問，咁高姿態鬧球會、鬧坦夏，曼聯冇辦法唔回應。話C朗冇耐性又好，做醜人都好，決意「親手割破」愛恨纏繞。

終於分手啦，即將踢世盃嘅C朗唔使再分心，對葡萄牙當然有好處；曼聯亦可趁呢個空檔再籌組。球迷又點？十三問過幾個追捧紅魔好多年嘅老友，亦有睇相信係曼聯球迷嘅網上留言，當然有人鬧C朗或者曼聯，但大致同意呢刻分手係好事，亦有唔少人多謝同祝福C朗，毋忘佢多年嚟對曼聯嘅功績，再見亦是朋友。

「但慶幸尚能發現，在印象尚留紀念，每一刻都記得，你甜蜜過的臉……」容許十三呢個中年人又借用另一首歌詞，嚟個首尾呼應。

撰文：球十三
足球迷叫第十二人，冇偏愛，冷眼旁觀係十三。