【Now財經台】美國房地產信託基金(REITs)有回升跡象，但市場之前擔心商用地產按揭債劵CMBS破產，呢方面嘅憂慮又解決到未？新科技相關房託同傳統地產REITs比較，派息嘅分野係咪好大？ 安泓投資總監兼香港大學房地產及建設系客席副教授楊書健指，上周SPDR房地產類ETF(XLRE)跌咗2日，好明顯係炒作特朗普(Donald Trump)上台就會加息或減慢減息，周五(8日)已經反彈，1年已經升咗27%。CMBS拖欠率中，只有寫字樓嘅不良率不斷上升，反映只係寫字樓單一弱勢。佢又話，美國FTSE NAREIT房地產REITs中，只有約3.65%係純寫字樓嘅房託，反而好多新科技板塊都超過10%，包括數據中心、工業、發射塔，連醫療板塊都超過10%，XLRE中約40%股份都係與新科技股相關。Victor續指，美國、澳洲、英國都處於息率高原期，澳洲及美國嘅REITs指數以一年計升約30%，但英國就冇太大升幅。佢建議，想買房託嘅投資者，想追新科技股，就可以直接買科技股。若以收息為主，英國房託及本港房託都值得留意，因為派息率遠遠高過美國及澳洲。