【Now財經台】人工智能(AI)熱炒股嘅超微電腦(Super Micro)宣布，上任唔夠兩年嘅核數師安永「跳船」，拖累超微電腦股價昨晚(30日)收市暴瀉逾32%，報33.07美元，昨晚一跌，今年嘅升幅幾乎化灰，市場對呢個消息反應咁大，對整體AI投資影響大唔大？ 東亞銀行財富管理部首席投資策略師李振豪指，唔評論個別核數師問題，但對超微電腦嚟講肯定係一個壞消息。依家整個科技板塊中，市場只睇好一兩隻股份，因為龍頭嘅技術及研發唔係個個都跟得上，去到某個階段就會汰弱留強。佢又話，頭幾隻硬件股份會有較大支持，而軟件相關股份嘅波幅比硬件股更大，有軟件公司嘅股價急升急跌，市場焦點唔再係成板科技股，「洗倉」就會先洗2、3線股。如果投資者想趁低吸納，佢認為依家唔係一個好時機，要等美國總統大選及聯儲局議息後，先再做部署，又估計呢段時間持有AI相關股嘅投資者要捱下價。