雅虎香港體育 男生必學《結婚進行識》金句！挑戰女朋友問題 一句令女友由嬲變冧嘅回應
古語有云：「女人心 海底針」、「女人來自金星，男人來自火星」……實在有太多男人都覺得女人太難估，好似女朋友問每條問題自己都會答錯，又或者自己講乜都唔啱！近排有套愛情小品電影《結婚進行識》，由《22世界殺人網絡》奇洛李維斯同《怪奇物語》雲露娜維達主演，入面以憤世嫉俗方式討論男女之間對世俗愛情觀的重大分歧，雖然搞笑，但真係好有共鳴！正因男女愛情觀的分歧，小編總結咗5大條堪稱史上「女朋友最難答5條問題」，教返男朋友應該點答先唔會激嬲女朋友啦！
▲電影《結婚進行識》預告
1. 「點解遲到？」
雖然話遲到係女人嘅專利，但有時男人都係人，都總會有遲到嘅時候，好人之常情，但喺「女人遲到大哂，男人遲到錯哂」嘅潛規則之下，男朋友一遲到，女朋友一定會問：「點解遲到？」然後女朋友就會金像獎最佳編劇上身，為你創作一堆不可能的故事，例如「你頭先擺明去見第二個！」「你唔再愛我！」「我地分手啦！」其實要化解，你只需講：「我成日都等你㗎，但我都好開心，因為人生有個值得等待嘅人係件好幸褔嘅事。」女朋友仲唔當堂冧死？
2. 「你愛唔愛我？」
呢條問題相信100%嘅女朋友都有問過男朋友，而相信99%嘅男朋友都答錯過。如果你毫不遲疑地答：「愛！」女朋友就會話：「你答得咁快，即係假㗎啦！」；當你深思熟慮咁答，女朋友又會話：「諗咁耐，即係唔愛啦！」其實女朋友心裡面早已有個答案，知道男朋友都係愛自己嘅，只不過有時候總係想聽到啲既窩心又有創意嘅答案。所以最佳答案係：「每天愛你多一些！」
3. 「我有啲咩吸引你？」
呢條其實同「你點解愛我？」、「你愛我啲乜？」一樣，只係字眼唔同，但男人通常好少會認真答。近排由奇洛李維斯同雲露娜維達主演嘅電影《結婚進行識》(Destination Wedding)就道出咗男人當遇到女人呢條問題時嘅最佳答案。電影中，奇洛李維斯飾演毒舌寡佬，喺出席一次旅行結婚時巧遇寸咀盛女雲露娜維達，兩人72小時內靠鬥咀擦出愛火花。旅程臨完結前，女主角問男主角：「我有咩吸引到你？」男主角答：「你嘅臉好合乎黃金比例，呢個係好難得㗎！」其實，女人都鍾意聽啲實在嘅答案，千祈唔好答啲虛無飄渺如：「感覺啦」、「鍾意就鍾意，冇點解」呢啲答案，女朋友一定會反你眼！
4. 「我係咪肥咗？」
又係一條全天下男朋友都會答錯嘅問題！當女朋友一世都減緊肥嘅時候，佢一定都會問你呢條問題，但你記得千祈唔好答：「唔係呀！」因為女朋友一定會回你：「唔係喎，你睇下我呢度呢度好多肉呀！」男朋友們，其實「我係咪肥咗」呢句話嘅潛在意思係「你愛唔愛我」，女朋友怕你一旦嫌棄佢肥，就等於唔愛佢。所以，最佳答案係：「無論你變成點，我都一樣咁愛你。」記住，千祈唔好由你把口講出個「肥」字，即使你個答案係：「就算你肥咗，我都一樣愛你」都係錯！因為女朋友對耳只會聽到「肥咗」兩隻字！
5. 「如果我離開咗你，你會點？」
假設性問題係女朋友最常問嘅問題，「如果我死咗，你會點？」、「如果我生Cancer，你會點？」、「如果我唔再愛你，你會點？」其實呢堆問題都係源自女朋友看得電影和電視劇太多，總會幻想自己如劇中女主角一樣，男主角會為自己愛得轟轟烈烈，傷心痛哭，要生要死嗰種。當然你可以參考電視劇和電影男主角的做法，但事實上你地又冇經歷到，所以都只能停留於口頭回覆，最佳回應答案就係：「我覺得我搵唔返第二個，因為我淨係愛你一個！」記得要帶點真誠呀！
推薦閱讀:
Follow us on:
Facebook: CosmoHK
Instagram: @cosmopolitan_hk
YouTube: CosmopolitanHK
