【Now財經台】美國電腦巨企戴爾(Dell)昨晚(26日)喺美股收市後出咗業績及今季指引，上季收入按年增長10%，經調整每股盈利2.15美元，至於今季指引就差過預期，拖累股價盤後急瀉11%。 南華金融集團副總裁莫灝楠指，Dell股價插水有兩個原因，首先係市場憧憬Dell定單多咗，加上同超微電腦(Super Micro)都有定單交接，但最後增長冇預期咁好，其次係同市場氣氛有關，投資者普遍認為Dell呢類公司估值唔算特別平。佢又話，Dell上季業績其實冇乜大問題，純粹受電腦銷售差，以及業務指引唔樂觀拖累，不過，市場唔應該單睇電腦銷售，長線應該將重點擺喺數據中心業務收入。