【Now財經台】港股今日(26日)愈升愈有，航運股亦跟隨大市向上，其中，中遠海控(01919)一度升逾4%，高見12.52元，東方海外國際(00316)曾升逾2%，高見109.4元，雖然美國東岸港口罷工風險，以及地緣政局都會影響航運業，但相關股份仍可繼續向上，係咪反映呢啲因素其實對航運股有正面影響？艾德金融執行董事陳政深指，今年環球供應鏈出現「洗牌」嘅情況，整體物流情況分散，加上美國罷工情況有蔓延嘅趨勢，一旦有大型工業行動，航線有機會走西岸，航運費和供應鏈成本增加，令通脹加劇，到時整體經濟復甦都會受到拖累，對航運股係咪真係有正面影響仍然係未知之數。Ryan又話，航運股如果炒運費就睇好中遠海控，除可直接受惠，股價亦有破位之勢，相對其他航運股而言更值博。