【EURO點睇】Permission to Watch!

·2 分鐘文章

【Now Sports】前日當韓團BTS推出新歌《Permission to Dance》MV前5分鐘,有百萬人喺youtube「正在等候」。寫包單,由英格蘭鬥意大利嘅呢場EURO決戰前,等候嘅人何止以億計算;BTS用國際手語跳舞,英意兩軍就用足球呢個國際語言,喺溫布萊足球大舞台爭霸。
撰文:球十三除世界盃決賽外嘅最受矚目球賽,仲要係香港人粉絲眾多嘅英格蘭同意大利首次大賽決賽對撼,點可以錯過?搞到連今早場美洲國家盃決賽,甚至同樣喺倫敦爆發嘅溫布頓男單決賽都好似要靠邊站。

英格蘭等咗55年至再闖大賽決賽,差呢步點都同你死過,國內媒體刻意營造奪冠氣氛,講緊點慶祝、領隊修夫基封爵云云……,勢頭係好勁。數猛將,sports.now.com噚日講完哈利簡尼,冇可能數漏最初包辦球隊全部入波嘅福將史端寧,佢細細個就立志做King of Wembley,睇佢能否幫自己同幫國家圓夢。

意大利決心,唔會比英格蘭小。上屆打唔入世界盃簡直係國殤,痛定思痛由文仙尼掌舵脫胎換骨,話隊波球星唔多,只因為球員多屬實而不華,好似今日【決戰EURO之猛將篇】其中主角佐真奴就永遠唔起眼但作用大,若然未聽過佢同媽媽嘅足球故事,值得細味。

寫意大利對土耳其場揭幕戰歷歷在目,原來眨眼一個月,睇過咁多場好波,冇理由唔捱夜睇埋隨時有今生冇來世(點知英格蘭下次再入決賽係何年何月)嘅戲碼。

撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen

【歐國盃決賽】英格蘭VS意大利
Now TV 618台12/07 03:00直播
Now TV 616台4K直播
Now E 同步直播

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能