【22世盃‧衫國演義】歐洲篇(下)

【Now Sports】三間牌今屆決賽周共贊助7支國家隊,歐洲隊佔咗4隊,包括西班牙、德國、比利時及威爾斯,主場球衣設計有別於日本,偏向於保守型,不像日本國家隊般有嘩一聲感覺。

作客波衫設計上較為突出,以西班牙為例,用上天藍色為主,配上波浪形條紋,贊助商及隊徽放置於胸口中間,肩位三間條紋用上西班牙國旗紅黃色,detail位算係叫做多,而且天藍色波衫都幾醒神,睇吓西班牙決賽周時可唔可以表現更好。

西班牙作客波衫
西班牙作客波衫 (Getty Images)

4屆盟主德國暗紋主場白色波衫,中間黑色直間配上金色贊助商logo及隊徽,肩膊位三間亦以黑白色為主,大路得嚟應該合晒德國球迷心水。作客黑色棗紅色波衫,主要以大型DFB暗紋圖案組合而成,整件衫頗為沉色,領口用上V領,而隊徽及贊助商logo沿用金色配搭。

德國主場波衫
德國主場波衫 (Getty Images)

至於比利時主場球衣以紅色黑色配搭,最特別係袖口位有近似火燄的圖案,雖然冇以前日本國家隊著作火燄波衫咁搶,但都算係一個別出心裁設計。作客方面則屬於一件充滿愛嘅波衫,係三間牌同比利時足總及源自於比利時嘅Tomorrowland明日世界電子音樂節合作宣揚愛訊息計劃,波衫袖口、側腰都印上彩色條紋,而波衫領口內更有LOVE字樣,係充滿訊息嘅一件世盃波衫。

比利時主場球衣
比利時主場球衣

提到訊息波衫,當然要提丹麥主場紅及作客黑色及白色隱形戰衣,係贊助商特意在支持丹麥出戰決賽周同時,抗議卡塔爾喺籌備賽事期間,奪去數以千計人命,忽視人權,充滿態度嘅一次球衣展示。

丹麥隱形戰衣
丹麥隱形戰衣 (Getty Images)

撰文:沙維斯達

相關文章:
【22世盃‧衫國演義】歐洲篇(上)
https://news.now.com/home/sports/player?newsId=sp37256536009
【22世盃‧衫國演義】亞洲篇
https://sports.now.com/home/news/details?id=37203669996

歡迎瀏覽【一齊做世界】facebook專頁,與我們團隊一齊陶醉世界盃:
https://m.facebook.com/groups/827307045372579/