《C9特工》反應麻麻被嫌製作兒戲又老土 連《實習天使》道具都亂入

《C9特工》劇照
《C9特工》劇照

由高海寧、馬國明及黎諾懿等人主演嘅無綫劇集《C9特工》,淨係睇個名就知道係以師奶特工為題材啦!劇情主要講述特工C9余小嬌(高海寧飾)所隸屬嘅特工組織分部無故爆炸,佢自此就同總部失聯。之後,小嬌就引退並下嫁賣菜佬高大勁(馬國明飾),成為一個不折不扣嘅師奶。點知昔日拍檔B3馬雷斯(黎諾懿飾)突然出現,仲要求佢幫手搵出殲滅組織嘅元兇,自此佢過著師奶及特工嘅雙重身份生活。劇集喺前日開始播出,等我哋一齊睇下網民有啲咩反應啦!

感覺製作兒戲馬虎
無綫劇集質素參差,過往都有唔少劇集畫面被網民恥笑係「膠劇」。今次《C9特工》只係播出咗兩集,就被網民指製作兒戲及馬虎,例如特工組織設喺商廈入面、特工組織大爆炸但pizza盒冇事及天台好假等等。仲有一幕就更加離譜,就係喺余小嬌遇車禍入院,甦醒後見到嗰位護士嘅工作證唔係佢本人,而係岑麗香(香香)喺《實習護士》嘅工作證。

《C9特工》截圖
《C9特工》截圖
《C9特工》截圖
《C9特工》截圖
《C9特工》截圖
《C9特工》截圖
《實習天使》截圖
《實習天使》截圖

劇情老土又沉悶
剛過去播出嗰兩集,劇情就已經交代咗余小嬌由特工變師奶,全職照顧高大勁一家。不過劇集太多家庭食飯及溫馨情節,唔少網民都話悶及老土,紛紛留言話:「悶到爆」、「睇完一集真係悶到爆,打鬥場面又hea, 劇情老土,今晚唔使睇」、「套劇啲劇情都幾老土下」、「呢套嘢真係堅悶,95%劇情和特工無關,想起特技人,95%劇情和特技無關」、「真係悶,節奏好慢」、「成日sell溫情,其實好悶下」及「越睇越無興趣睇,好悶的一套劇」等等。

《C9特工》劇照
《C9特工》劇照

乜又係你呀
繼《殺手》、《迷網》及《反黑路人甲》後,《C9特工》已經係高海寧連續第4套出街嘅無綫劇集,劇接劇輪住播嘅佢今次真係破晒紀錄。雖然高Ling幕前曝光率激高,不過唔少網民都話睇到膩,紛紛留言話:「成日都見到高海寧,睇到人都悶,飛」、「又高ling」、「成日見到高ling好煩」、「睇到好悶,又係高海寧!其實TVB係咪冇人?」及「厭到關了電視」等等。其實除咗高Ling之外,吳嘉儀同樣連續4套劇集出街,分別係《迷網》、《反黑路人甲》、《過街英雄》及《C9特工》,而「御用細佬」朱敏瀚都有3套,分別係《迷網》、《反黑路人甲》及《C9特工》。

《C9特工》截圖
《C9特工》截圖
《C9特工》截圖
《C9特工》截圖

高海寧動作戲生硬
高海寧喺劇中飾演特工,咁當然有大量動作場面。睇完第1集嘅動作戲後,唔少網民都話高海寧動作生硬,留言話:「動作生硬,一般,唔吸引」、「睇預告高海寧做特工嘅身手唔係咁利落」及「高ling做特工嗰陣動作生硬,眼神同表情又唔夠硬淨,睇完李沁有比較,雖然之前嗰套係古裝。」等等。

《C9特工》劇照
《C9特工》劇照