【黃VIU播戀愛世紀】神級日劇的15個關鍵字 木村拓哉捧紅Porter袋Red Wing鞋

繼《悠長假期》之後，木村拓哉另一經典日劇《戀愛世紀》(Love Generation)即將喺線上平台免費上架！《戀愛世紀》堪稱係80後集體回憶，當年個個屋企都有一套VCD瘋狂通宵煲，而且個個男仔即使冇木村咁型都一定會以「木村LOOK」出街。

片桐哲平

木村劇中角色，對比《悠長假期》嘅深情鋼琴家，哲平呢個角色貼地好多！佢同理子（松隆子 飾）一相遇，就想帶人地去爆房。之後喺工作上由設計師被調去跑數湊客，以及糾結於現任同前任之間，簡直係每個廿幾歲男人嘅經歷。而呢個時候嘅木村，男人味同少年味嘅比例啱啱好，你睇呢個大頭shot，真係無敵！

上杉理子

奠定松隆子演藝界地位嘅重要角色。喺《悠長假期》擔當女二，角色設定一定俾山口智子比下去。上杉理子嘅戲份由頭帶到尾，而且松隆子將少少「港女」性格演得唔乞人憎，係難嘅。

剪馬尾

哲平加入營業部，但係死都唔肯剪走長髮，仲同上司嘈交。理子作為同事，竟然一手剪走哲平條馬尾。第一集就咁爆，難怪大家會追落去。

Porter 3 Way 袋

歷年嚟木村喺劇集用過嘅潮物，幾乎所有都會爆紅，甚至係當劇集播完一集，當晚喺拍賣網就有人用「木村著用」做招徠。當時木村無論係西裝定便服look都襯到個Porter 袋，令呢個老牌功能袋成為人氣潮物。

粗冷衫

成套劇嘅styling都好強，劇集後段理子同哲平去完遊樂場後決定分手，嗰幕著嘅粗冷衫，好配合理子嘅直率，當時唔少古著鋪都有入貨。

片桐莊一郎

內野聖陽飾演劇中木村嘅阿哥，同樣糾結於感情瓜葛，其實幾唔討好。事隔廿幾年後先發現，劇集《昨日的美食》演男同志髮型師嘅，原來係內野聖陽！點解完全唔同樣？！！

藤原紀香

本來係日本小姐冠軍，後來經常以水著造型成為雜誌封面，《戀愛世紀》令紀香嶄露頭角，甚至打出日本市場，嚟過香港拍電影《雷霆戰警》，仲同郭富城傳緋聞。

吹石一惠

純粹係客串做理子個妹嘅女演員。有咩特別？吹石一惠可以收服到靚仔但又唔肯「上岸」嘅福山雅治，仲生埋仔喎，係有一手嘅。

CAGNET

日劇最勁嘅年代，一套劇所有元素都可以獨當一面hit起來。為《悠長假期》同《戀愛世紀》配樂嘅組合CAGNET，領軍人物日向大介同兄弟日向敏文都係日劇配樂高手。CAGNET美式曲風為劇集帶來嶄新風格，而星爺嘅《喜劇之王》都搵咗日向大介負責音樂。

淺野妙子

著名女編劇，《戀愛世紀》之後仲寫過《神啊！請多給我一點時間》、《二千年之戀》甚至史詩式歷史劇《大奧》。唔少劇迷鍾意將《悠長假期》同《戀愛世紀》，認為後者劇本節奏無咁明快。

收視

喺嗰時嘅「月九」（星期一晚9點）檔播得，收視實有保證。《戀愛世紀》開播收視率就超過3成，之後保持平穩，大結局錄得32.1％，平均收視係電視台史上第2，更勝《悠長假期》。

水晶蘋果

哲平屋企嘅小物之一，亦代表哲平同理子嘅關係，每集片頭都會出現，唔使諗都知當時有幾多男仔買嚟氹女仔，不過好多都係買仿冒嘅「玻璃」蘋果……

Red Wing

只要唔係著西裝嘅戲份，都可以見到木村著住Red Wing！呢種格仔衫＋牛仔褲＋work boot嘅美式打扮，可以話係木村引入。亦因為咁，Red Wing由多年前喺香港無人問津，成為歷久不衰鞋櫃必備。

彩虹橋

劇中兩場戲嘅背景，結果好多情侶睇完因此去東京朝聖，亦令台場呢個新發展地區變成遊客熱點。

True Love Never Run Smooth廣告

出現喺哲平個雪櫃嘅海報，上面寫住呢句slogan。海報上除咗有水晶蘋果，True Love Never Run Smooth亦係哲平同理子關係嘅寫照。