【鏟草男女】皇馬今季可以行幾遠?

·3 分鐘文章

【Now Sports】經過剛剛作客勝奧沙辛拿,皇家馬德里離西甲聯賽封王只差4分。第2位同第4位嘅馬德里體育會同西維爾,分數上已經無法奪冠,而第3名嘅巴塞隆拿數字上反而仲有機會,如果佢哋贏晒之後西甲比賽,而皇馬無法喺餘下5場西甲拎到最少1勝1和或4和嘅戰果,至有機會。
撰文:June巴塞隆拿教練沙維喺訪問指球隊仲未同西甲聯賽講byebye,都正常嘅,唔通呢個時刻話放棄咩?唔理人哋踢成點,只要皇馬可以拎多4分就會奪冠,安察洛堤就會成為首位贏過5大聯賽冠軍嘅領隊。而且佢仲係首位橫跨4個年代(1990-2020)都帶領自己球隊入歐聯4強嘅教練。雖然佢換人方針依然令部份球迷不滿,但皇馬剛剛對奧沙辛拿(除咗加利夫巴爾出發前,再次不能上場,皇馬無交代佢係不適定受傷。),佢起用好多後備球員,特別施巴約斯同洛廸高,表現亮麗。

無雲尼仔(雲尼斯素斯),洛迪高可以踢返佢擅長嘅左翼位置,睇到明顯比之前踢右翼發揮得更好,走位同切入都順暢,搏到兩個12碼(可惜球皇賓宴客),下半場後段只要佢一入禁區範圍,奧沙辛拿就已經有幾個球員「招呼佢」。

而施巴約斯老實講,我係好少睇佢踢波。因為我冇睇開阿仙奴,而佢喺皇馬又無乜上場。但噚日一睇,發現佢都幾落力,製造咗幾個機會之餘,又積極參與進攻,絕對值得更多機會。另外,今日30歲生日嘅伊斯高,雖然有一段時間無出,但都冇「雪到硬晒」,令球迷覺得佢值得續約。

皇馬今季西甲可以領先10幾分,除咗安察洛堤戰術運用上出色,佢話有部署可以改變戰局嘅球員之外。其實仲有係因為今年各球員都好fit,傷患減少咗,球迷真係要多謝呢一位功臣,就係皇馬體能教練 Antonio Pintus!

不過,歐聯4強對曼城將會好難打,特別係近幾場上半場都好似踢得比較hea......(慢慢嚟,好似未發力,有時直情無咩攻勢想控下球先咁),而過去10場只有2場零封對手,一對中堅默契亦未成形,比賽有無左閘都屬未知之數,對曼城嘅進攻真係有好大弱點。皇馬唔通真係要靠前面入多啲波嚟中和番個防守?情況真係令人擔心。不過今日見皇馬真係有可以改變戰局嘅球員,今場又有機會踢一陣,希望唔會係俾曼城㩒住嚟打啦。

雖然好多球迷話,今季冇咩入貨黎講,皇馬拎到西甲同入到歐聯4強都算超額完成,但都行到嚟呢步,唔通真係唔想再入多次歐聯決賽? 做人老實啲好,我呢......,就好想球隊可以行多兩步嘞。

撰文:June
旅皇迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。

歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能