【角色造型超神似】無綫新劇《超能使者》向Marvel及DC致敬？

無綫《TVB節目巡禮2021》喺星期日播出，節目預告咗來年有啲咩新劇，例如《BB大晒》、《七公主》、《白色強人II》、《踩過界II》、《金宵大廈2》、《陀槍師姐2021》及《兒科醫生》等等，但當中《超能使者》預告最吸睛，有網民留意到TVB莫非想組成無綫版正義同盟？劇集搵嚟陳展鵬、唐詩詠、陳山聰、林子善、沈震軒、王君馨及劉穎鏇等人主演，唔少劇中造型同Marvel和DC英雄角色好相似。劇集預計會喺下年播出，雖然劇集卡士陣容強勁，不過角色造型缺乏一致性，唔少網民都擔心劇集會淪為膠劇。

《超能使者》以「異能英雄」作為題材，主要講述陳展鵬及唐詩詠因一場交通事故受傷，康復後意外擁有超能力，化身成香港版正義同盟用超能力拯救市民。除咗造型抄足Marvel和DC電影之外，連超能力都抄埋。男主角陳展鵬飾演按摩師鍾孝年，可以快速移動，又可以用手指彈走子彈，同Marvel「快銀」一樣。

唐詩詠飾演臨時演員領班喬若嵐，與鍾孝年有感情線。佢喺用超能力時，頭髮及瞳孔都會變紅，造型勁似Marvel「緋紅女巫」。

陳山聰飾演國術隊成員高勇、係高守（林子善飾）嘅孖生細佬，身形健碩嘅佢，除咗刀槍不入之外，仲連汽車都撞佢唔死 。

飾演黑幫頭目韋瑞琦嘅王君馨，造型同黑寡婦有啲似，經常著皮褲和高跟鞋，拍得住黑寡婦咁型。

劉穎鏇喺劇中飾演小混混柯翠屏，與高勇係歡喜冤家，造型似足DC電影小丑女，妝容同衣著都色彩鮮豔。

而「KC」歐瑞偉一改《愛回家》著西裝形象，劇中飾演黑幫頭目賀慶隆，留到成臉鬍子，睇落有幾分似Iron Man。