笑到最後|銀行地產配合 金融夜市更繽紛(高明)

銀行地產配合 金融夜市更繽紛
夜市嘅邏輯,就係日間消費唔變,夜間再做一水。 (Scott E Barbour via Getty Images)

香港特區最近落實夜市政策,睇相見仍然係過去大笪地嘅性質,最多只係用美酒節嘅包裝格調,其實都係未有用盡香港國際金融中心基建。事實上,只要銀行同地產商肯協助特區政府施政,推出金融夜市配合香港夜繽紛,夜市可以重返高峰。

下載Yahoo財經APP

美股外幣即時報價 多國新聞任睇

夜市嘅邏輯,就係日間消費唔變,夜間再做一水,有如茶餐廳翻枱率,一個晚市做四枱客等於一個時段四倍收入。香港餐廳一個晚市都可透過翻枱率倍增收入,夜市就係一拆二,成個經濟倍增就不得了。

之前講過,搞夜市唔可以淨係將粒魚旦夜晚賣,因為夜市就係有啲嘢日頭做唔方便,道德上唔夠美觀,所以要夜晚做。唔係淨係粒魚旦放喺夜晚街邊檔賣50蚊一串,就算畀你成交到,相對香港經濟都係太濕碎。

香港最發嘅兩個行業:地產金融,只要肯配合特區政府施政就會繽紛。

金融監管:好似以前有夜生活時,中環好多酒吧日頭只係普通餐廳,夜晚10點後就變成夜場,男男女女去蒲去媾仔媾女,做一啲日頭唔適合太揚做嘅事。特區金融監管制度,能唔能夠有晚市優惠,例如一啲日頭上唔到會嘅人,去到金融夜市,同孫女飲完酒放鬆冇咁大壓力,壓力測試都調低少少,就隻眼開隻眼閉批畀佢?銀行多數旺區開,個個夜晚去上會夜市想唔發都幾難。

夜晚買樓有7折

銀行:正如上面所講,夜市概念係翻枱率問題,一日一拆二令收入倍增。銀行會唔會願意配合特區,例如夜晚出街嘅市民,如果喺指定夜市消費,佢嘅儲蓄戶口派多次夜息,貫徹一日拆二嘅理念。又例如覺得上面太難執行,會唔會完善回贈機制,日間信用卡消費回贈5%,晚上10點後信用卡消費,回贈10%,兼且冇上限。好多嘢,只要銀行肯配合政府施政,自然水到渠成。

股票:之前寫過港交所夜市(現貨),唔重覆。

地產代理:以前夜晚睇樓好閒,正常人都係放工睇樓,依家形勢有變,只要地產代理願意配合,夜晚睇樓兼且成交,佣金半價,啲人睇完樓肚餓,佣金平咗又唔會介意50蚊串魚旦,樓市好、餐飲好。

地產商:同理,夜晚買樓有7折。又或鼓勵夜生活,近兩年交樓嘅住宅,發展商提供每10分鐘一班來回香港夜繽紛場地嘅業主專用穿梭巴士,管理費包埋,唔去蝕底,香港精明業主一定去。近年推出嘅納米樓,本質上都係鼓勵出外消費,配合免費穿梭巴士一定會旺。而大巴、司機、油錢,成本有限,都係管理費攤分,其實唔難。

點解以前夜生活吸引?因為可以體驗日頭做唔到嘅嘢。同樣道理,如果香港係國際金融中心,有自主研發金融創新能力,首創金融夜市,投資者夜晚有唔同嘅體驗,一定會出街。兩個字:配合,夜市一定得。

高明

facebook:https://www.facebook.com/bigricetea

IG:https://www.instagram.com/koming.usstocks/

作者簡介︰賺錢係目標,炒股係手段,專欄記載由手段到目標嘅過程。

本欄逢周六刊出