發福余文樂！香港娛圈五大男神當年今日一覽

十幾年前香港娛樂圈有幾位三百六十度零死角嘅男神，風魔萬千少女，佢哋就係人稱圈中五大男神嘅余文樂、陳冠希、謝霆鋒、吳彥祖及馮德倫。當年佢哋真係紅遍亞洲，可惜幾位婚後發福變哂樣，五大男神都好似走哂樣咁。

余文樂

曾經操得一身肌肉嘅余文樂外型討好，有樣有身型。2017年同台灣「皮帶大王」千金王棠云結婚生子後，愛上留白鬚、著鬆身衫。喺前日，佢上載揸車同囝囝外出嘅相片，唔少網民話發咗福嘅余文樂同谷德昭撞晒樣。

陳冠希
陳冠希有一張極有辨識度嘅樣，有少少年少輕狂，又有啲稚氣，歪嘴笑一笑，雙手插袋，真係令人又愛又狠。不過佢近年退出娛樂圈，主力放係潮流品牌同囡囡上，個樣又老又殘，完全唔似當年嘅小鮮肉。

謝霆鋒

謝霆鋒由出道至今都係行chok爆型男路線，無論唱歌定拍戲都吸引大量女粉絲，前排仲整咗捲髮變「小鮮肉」，完全冇中佬感覺。

吳彥祖

帶有混血兒感覺嘅吳彥祖，高顏值又有型，令佢喺男神界屹立不倒多年穩坐男神寶座。婚後佢將工作重心搬返美國，近年佢嘅顏值仍在，不過髮線就keep住向後移。

馮德倫

馮德倫同吳彥祖及謝霆鋒差唔多時候出道，不過當年魅力不及另外兩人，但年紀愈來愈大，馮德倫個陣男人味出晒黎。2016年同舒淇閃婚後，兩人生活低調，佢同余文樂一樣愛上留白鬚，睇落老咗唔少。