家族榮耀︳于洋幾度進出TVB最終走人 後生時揸跑車力追家燕姐

《家族榮耀》中飾演馬家老爺馬世宏嘅于洋，可以話係TVB「御用有錢人」代表，唔少角色都係做富商、皇帝。近年唔少TVB資深演員都不滿「一年一騷」制度而走人，甘草之一嘅于洋原來已經約滿後已經低調離巢，《家族榮耀》係佢以自由身參演嘅作品。

原名龔子超嘅于洋，70年代加入TVB後進出大台多次，皆因于洋1972年移民加拿大，試過喺當地開餐館同Disco，間中回港拍劇，過足戲癮就返加國。于洋1998年起再度回歸，參演《真情》入面飾演好姨（薛家燕飾）第二任老公高山青，之後一直留港拍劇。原來于洋同家燕姐唔止係螢幕情侶，後生嗰陣佢地真係「有啲嘢」！

揸最潮跑車約家燕姐

于洋喺一篇訪問提到，佢同家燕姐係舊同學，因為拍戲而重遇，會一齊去party或者飲吓咖啡，于洋仲會揸架當年最潮嘅跑車接送。雖則自認花弗，但係于洋好細心，知道家燕姐會去日本拍戲，買機票跟埋過去不特止，仲送上一大篋零食，超冧！

畢竟嗰個年代，男女交往仲係要父母批准，家燕姐嘅媽咪眼見于洋生活多姿多采而有意見，最終佢地都冇成為情侶。于洋之後去party認識一名中環寫字樓秘書，並結為夫妻。

事隔多年，于洋遇著憑《真情》大紅嘅家燕姐喺美國登台，當時家燕姐話《真情》劇組想搵個做過小生嘅演員，同好姨發展新嘅感情線，以接替本來同好姨談情嘅黃錦燊。于洋得到太太批准就回港拍劇，直到前年約滿TVB。

近年于洋獲安排嘅角色都係有錢人、慈父、皇帝之類，而且非常勤力，平均一年最少有4套劇有份，2013年更加有12套劇見到佢，出鏡率高過力捧小生花旦。但係畢竟年紀有返咁上下，2008年于洋一度因為心臟問題而要「通波仔」。拍《家族榮耀》時于洋提過，拍完呢套劇會返加拿大陪屋企人。

【相關搜尋】薛家燕秘戀12年男友

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！