【球迷會請入】維拉球迷:我哋睇住加利殊大

【Now Sports】2023香港足球會七人足球賽今日開打,相信不少球迷記得英格蘭球星加利殊當年曾兩度隨阿士東維拉訪港,在這賽事發亮發熱。且聽過去多次接受本網站訪問的香港維拉球迷會主席Kidd,細聽巨星如何崛起,並談談艾馬利本季如何令球隊脫胎換骨。Q:七人賽開打,知你一直有留意呢個賽事,可否分享下當年點滴(例如你同加利殊認識經過)?今屆賽事有咩睇頭?
阿Jack,我哋真係青年軍睇到佢大,佢當年(2013及2014年)嚟香港參加七人賽,之前亦已經開始出名,因為之前維拉贏過Next Generation Cup,你可以當係年青版歐聯前身,當年佢都唔算擔大旗,但已經多人留意佢嘅表現。後嚟佢喺香港,憑一人之力,加上技術出眾又靚仔,當然受歡迎。可以咁講,我哋由細睇到佢大。
香港球迷睇七人賽,最想睇一個扭幾個,加利殊絕對係呢一類型球員,從而吸納到一班香港球迷。我哋亦透過七人賽,更加了解球會有咩超新星誕生。今季有好多未來球星,好可惜Rory Wilson 因為參加歐洲U17錦標賽無嚟香港。

Q:可否簡介一下你哋球迷會?
喺2011年未成立球迷會之前,我哋都好個人化,冇一個特定組織,就算有都可能係外地人。嗰年香港舉行英超挑戰盃,維拉官方舉辦咗一個活動,咁啱我參加咗遊戲,可以入大球場睇training section,就喺嗰次識咗幾位本地維拉球迷,大家交換contact就成立咗個group,之後就搞咗香港維拉球迷會。之前都有講過有個外國人成立官方嘅Lions Club,但嗰個唔夠香港化,冇人知道呢個club,亦冇人join,而我哋見維拉喺我哋年代都有自己嘅球迷,同埋都有歷史底蘊,所以吸納咗一班老球迷,從而我哋都成立一個屬於local嘅球迷會。
Lions Club個會長都唔係香港人,之後佢返番英國,佢推薦我成為官方球迷會主席。即係除咗fb個香港維拉球迷會,我都係Lions Club嗰邊個主席。我哋將兩邊做接駁位,外國人通常用email聯絡我。疫情前,維拉官方大使伊恩泰萊每年都會嚟香港同球迷會聚會。


Q :維拉近年起起伏伏,維繫球迷會會唔會有困難?
維拉曾經降班,反而覺得呢件事令自己球迷更加團結,做勝利球迷好易,當球迷冇成績、降班,自然會流失勝利球迷。維拉都喺英冠浮沉兩三年,慶幸呢班球迷不離不棄,反而降班係一件好事,球會方針改變,因為降班前球會架構幾混亂,財政亦唔太穩健。降班後換咗班主,令架構健全啲,令球會有好嘅將來。一班球迷經過低潮,令我哋更團結。

Q:艾馬利令球隊脫胎換骨,你認為佢令隊波最大改變係咩?
最主要令後防更穩固,其實喺謝拉特,甚至之前嘅甸史密夫年代防守都比較鬆散,艾馬利上場後防守專注度有所提升;以前失球後,隊波會混亂,但依家就算失球都唔會有呢樣嘢發生,而呢大半季,維拉被反勝嘅情況少好多。
陣式上,依家踢緊話就話係傳統嘅4-5-1,嚴格嚟講係6-3-1,你見到兩翼好多時都返嚟防守,艾馬利不嬲以防守行先,紀律性亦唔錯,兩隻翼防守參與度多咗,庇利以前好懶,唔會返嚟,布安迪亞亦都係。依家一條心返嚟防守,所以維拉失球數字少咗。

Q:球迷會嚟緊有咩活動?
主要都係七人賽比賽,我都同官方聯絡咗,可以畀香港維拉球迷睇維拉青年軍練波。

Q:可否推介一個與你哋友好嘅本地球迷會/群組?
諾定咸森林香港球迷會。

相關文章:
【球迷會請入】紐卡素球迷會:煞科戰打邊爐睇波
https://sports.now.com/home/news/details?id=38582838465
【球迷會請入】帕爾馬球迷:我哋有咩未經歷過?
https://sports.now.com/home/other/details?id=38538818560
【球迷會請入】白禮頓球迷:好有信心進軍歐洲
https://sports.now.com/home/news/details?id=38494029616
【球迷會請入】AC米蘭球迷:歐聯入決賽一定大搞睇波
https://sports.now.com/home/other/details?id=38444516918
【球迷會請入】賓福特香港球迷會:贏曼聯4:0收穫大
https://sports.now.com/home/news/details?id=38403816700
【球迷會請入】香港多蒙特球迷:平常心睇爭霸
https://sports.now.com/home/news/details?id=38357300105
【球迷會請入】「我可能係香港唯一布力般球迷......」
https://sports.now.com/home/news/details?id=38300493733

【球迷會請入】逢周五上載
各球迷會與群組,若想分享你們的故事與活動,不妨電郵:
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧!日韓】
星期四 【女足豪傑】
星期五 【球迷會請入】