《熟女強人》前晚首播 嚟緊ViuTV仲有咩自家製及合拍劇集推出?

《熟女強人》劇照
《熟女強人》劇照

近年ViuTV推出唔少好評如潮嘅劇集,例如《二月廿九》、《地產仔》、《教束》及《歎息橋》等等,劇集喺網上嘅討論度爆晒燈,深得唔少觀眾喜愛。而由吳家麗、胡杏兒、吳千語、沈卓盈、陸詩韻、何佩瑜、曾樂彤、傅穎等主演嘅新劇《熟女強人》喺前晚(28日)已經隆重首播,劇集以現代女性寫實心態做題材,探討佢哋所面對嘅難題,包括「雪卵」、「爭撫養權」、「同性戀」、「性上癮」、「換妻」、「爸爸去哪兒」及「脫單」。嚟緊ViuTV都陸續有自家製及合拍劇集推出,而家就同大家睇下有邊幾套啦!

《暖男爸爸》
《暖男爸爸》由鄭中基、張可頤、陳俞希、Crisel Consunji及強尼等人主演,劇情主要講述單親爸爸阿榮(鄭中基飾)獨力照顧囝囝「暴龍哥」,而張可頤飾演嘅芷明就係認識佢老婆嘅保險顧問,佢哋慢慢成為無所不談嘅好朋友。之後,芷明對阿榮由憐生愛,二人最終開花結果。今次係鄭中基相隔18年再度拍劇,對上一次已經係2002年無綫劇集《我要Fit一Fit》,期間佢都只係客串過《皆大歡喜》同《仇老爺爺》。另外,佢同張可頤曾經拍過2000年無綫劇集《緣份無邊界》,不過當時佢哋就冇對手戲。

《暖男爸爸》
《暖男爸爸》

《男排女將》
青春勵志劇《男排女將》由鄧麗欣(Stephy)、顧定軒及MIRROR成員卓賢(Ian)等人主演,劇集以前香港女子排球代表隊成員蔣家瑜作為藍本,講述熱愛排球嘅King(顧定軒飾)及Bobby(Anson Lo飾)但人原本係甲一排球隊隊員,不過因身高未能達標,所以被逐出球隊。而Stephy飾演嘅蔣家瑜因幾年前嘅重大打擊,令佢失去信心。當佢哋遇上後,除咗幾位年輕人命運改寫之外,更令蔣家瑜重新愛上排球,成為香港第一位男子排球女性教練。

《男排女將》
《男排女將》

《太平紋身店》
犯罪懸疑劇《太平紋身店》,搵嚟周秀娜、黃德斌、吳綺莉及林德信等人主演,劇情主要講述神秘女紋身師Nana(周秀娜飾)及其香港太平街隱世紋身店嘅故事,Nana仲會根據客人嘅奇幻經歷,然後幫佢哋度身訂造紋身款式。另外,劇集仲搵咗「人氣王」姜濤客串演出,佢喺劇中飾演被人殺害嘅葉蓋天(黃德斌飾)兒子葉天晴,相信「姜糖」們都會好期待佢嘅演出。

《太平紋身店》
《太平紋身店》

《無限斜棟有限公司》
喺今個月頭先進行開鏡拜神儀式嘅《無限斜棟有限公司》,除咗有金像影帝太保與金馬影后吳家麗及葉童助陣之外,仲搵嚟MIRROR成員陳卓賢(Ian)、盧慧敏、黃定謙、張建聲及沈殷怡等人主演,劇情主要圍繞陳卓賢、黃定謙及盧慧敏飾演嘅「斜棟青年」,佢哋開設公司為客人們解決事情。Ian早前就透露咗佢喺劇中係飾演私家偵探,要幫客人解決奇難雜症當中包括追女仔

《無限斜棟有限公司》
《無限斜棟有限公司》

《超感應學園》
合拍劇《超感應學園》係一套關於青春校園嘅劇集,喺演員陣容方面,除咗「台灣最強小鮮肉」蔡凡熙、劉奕兒、洪群鈞、林思廷及白靜宜之外,ViuTV亦派出MIRROR成員「人氣王」姜濤及「教主」Anson Lo為劇集進行拍攝,早前佢哋已經分別飛到台灣,隔離完就加入劇組,據知佢哋喺劇中會以校服造型示人。⁣

《超感應學園》
《超感應學園》

《塵沙惑》
懸疑推理劇《塵沙惑》同樣係合拍劇,劇集由亞太影后張榕容、金鐘影帝莊凱勛、「雙金」劉冠廷、等人主演,劇情主要講述刑事組探員徐梓薇(張榕容飾)喺調查一宗案件嘅時候,意外偵破一宗疑似連環兇殺案。外事警察陳家豪 (劉冠廷飾) 調職跟隨梓薇,喺佢身邊從旁協助。另一方面,政二代議員楊啟逍(莊凱勛飾)喺競逐連任期間被神秘鎗手狙擊,而梓薇就被啟逍點名負責保護,而喺保護過程中梓薇仲對啟逍改觀。而MIRROR成員Stanley亦有飛到台灣,喺隔離完就加入劇組進行拍攝工作,預計逗留兩個月。

《塵沙惑》
《塵沙惑》