港超專版 10路雄師新焦點 一帖睇晒!

on.cc東網
on.cc 東網

2019至20年度「中銀人壽香港超級聯賽」即將展開,這個夏天,各路雄師在轉會市場都十分積極,職球員變動更是自港超成立以來變化最大的一季。每隊各有焦點,有新帥、有老將、有新星,趁開鑼前上番個「港超雞精班」,睇波時就不會一頭霧水,粉絲們,上堂喇!

和富大埔
孫銘謙近年最有潛質球員
去季首奪聯賽冠軍的和富大埔,職球員均出現大變動,主教練由馮凱文與郭嘉諾一同擔任,「馮Sir」同時兼任總監,球員方面,就有陸志豪、陳文輝、車潤秋、陸平中、許嘉樂、孫銘謙、金玟基等加盟。「馮Sir」認為陣中19歲小將孫銘謙值得球迷關注:「『孫銘』係近年最有潛質嘅球員,上季佢喺凱景第一季踢港超,已經表現出水準,無論邊個做香港隊教練都揀佢。『孫銘』仲有好大進步空間,佢要兼顧讀書,能否更上一層樓視乎佢嘅心態。」


傑志
國家隊級新教練帶藍鳥飛
去季勇奪社區盃、高級組銀牌、足總盃的傑志,今季誓要重奪聯賽冠軍,既簽下洛迪古斯、基爾頓、蘇沙、霍斌仁,還留用多名年輕球員。同時間,「藍鳥」教練團亦出現新面孔,該隊成功邀請曾執教波黑國家隊的施利斯高域出任總教練,亦增聘前越南國家隊體能教練裴鋕垣擔任體能教練。

會長伍健透露,施利斯高域與裴鋕垣能起相輔相成的作用,在他們帶領下,一眾球員季前的表現相當不錯,年輕小將亦有進步。


冠忠南區
重點栽培本地前鋒陳廣豪
矢志爭奪球會史上首個錦標的冠忠南區銳意加強攻擊力,不但羅致了澳洲前鋒查維斯,還引入陳肇鈞、陳廣豪等華人射手。連同原有班底,南區鋒線可謂相當豪華。

主教練鄭兆聰對去季屢入世界波的陳廣豪寄予厚望:「我欣賞陳廣豪喺禁區內、外嘅射門能力,上季佢各項賽事總共入咗8球,呢個球員係有能力嘅,但要畀少少時間佢,唔可以急。我哋希望栽培佢,因為識入波嘅本地前鋒未必有好多個,希望佢有耐性,繼續跟我哋嘅外援學吓嘢!」


富力R&F
唔止伊高!𥄫實16歲陳嘉宝
5,000萬大軍富力R&F積極增兵,大眾的目光均放在伊高沙托尼、林柱機等球員身上,主教練楊正光則認為,年僅16歲的陳嘉宝亦不容忽視。

楊Sir說:「佢嘅技術及體格絕對比一般同齡球員突出,之前已經以U16嘅年紀踢U18嘅代表隊,以及港甲賽事。今季正式成為職業球員,相信對佢成長有好大幫助。陳嘉宝訓練時好快適應到快速及緊迫嘅節奏,用波及射門能力亦非常好,如果繼續努力,佢可能係另一位以16歲之齡喺港超上陣嘅球員!」


東方龍獅
胡晉銘大進步堅Sir都睇好
東方龍獅經歷一個不如意的球季後,不論管理層,還是球員均有大幅變動,除獲「最佳教練」李志堅加盟外,亦簽入15名新兵爭逐亞洲賽。

眾多新兵中,「堅Sir」特別看好胡晉銘:「我喺飛馬嘅時候同『晉銘』合作過一季,今季見番佢,覺得佢各方面都進步好多。佢係一個技術型嘅防守球員,有能力打到幾個位置,具備現代足球嘅中場球員質素。我覺得佢喺未來嘅日子可以走得更遠,加上佢嘅紀律、態度都好好,所以我對佢好有期望!」


香港飛馬
金球王馬高斯+陳7有咩火花?
「好波啦!隻左腳又犀利啦!態度又好啦!希望佢可以幫到球隊有好成績!」香港飛馬主教練文彼得說。能夠獲得新任教頭「文帥」如此讚賞的人絕非泛泛之輩,他說的是去季效力夢想FC、表現備受好評的西班牙中場馬高斯。

馬高斯雖然司職中場,但他上季於各項賽事合共轟入11個入球,成為隊中神射手。不僅如此,馬高斯部分入球更是金球中的金球。去季季末,飛馬隊長「陳7」陳肇麒曾公開表示希望與馬高斯合作,如今好夢成真,即管看看他們能擦出怎樣的火花!

香港飛馬會方同時透露有意承辦明年鼠年賀歲盃,或者會邀請日職和美職聯球隊來港獻技。


理文
陳曉明:等睇李康廉老來嬌
上季首奪菁英盃冠軍的理文今夏簽入列斯奧、佐迪、李康廉、李瀚灝等經驗豐富的球員,主教練陳曉明繼和富大埔和天水圍飛馬後,再與李康廉合作,「陳Sir」對此子的重要性予以肯定:「首先,佢唔會因為自己已經35歲,喺練波、健身方面做少啲,反而做得好足,令到其他球員唔敢偷懶,第二,佢可以提升全隊波嘅技術。雖然近年大家有少少遺忘咗李康廉,但我覺得佢今季有機會『老來嬌』,令大家記得番佢係好出色嘅華人球員。」


愉園
力量型快翼袁世傑挑戰巨人
老牌球會愉園經過「3年計劃」後,今季終回到頂級聯賽,除留用大部分升班功臣,還引入屠俊翹、林毅東、加維蘭、艾度古斯、盧斯安奴等。秉持培訓年輕球員宗旨的愉園,陣中有多名具潛質的年輕球員,6月曾出戰20歲以下5人足球亞洲盃決賽周的袁世傑(右圖),便是其中一位,這位快翼更獲愉園主教練鮑家耀盛讚:「袁世傑嘅速度同技術幾好,球隊獲得港超資格後,佢操練積極咗好多,力量可以抗衡到超聯球員,希望佢繼續進步。」


標準流浪
新血彭林林勝在夠快
闊別一季再戰港超聯的標準流浪,組軍雖倉促,人腳卻絕不失禮。球隊成功羅致歐陽耀冲、安達、杜馬思、安基斯等具經驗的球員,配合彭林林(左圖)、潘柏安、鍾昇霖、鄧樂文等年輕小將,期望在以老帶新下,能為香港培育新血。

教練黃展鴻特別看好彭林林,更在友賽中安排「林林」出任中場中,他解釋原因:「佢嘅優勢係搶波嗰下幾快,如果淨係擺佢打邊,就淨係用到邊線範圍,所以我想擺佢喺中間,要求佢不斷跑動,盡量利用佢嘅優勢。」


佳聯元朗
外援箭頭「優先考慮」祖連奴
去季多次為球迷製造驚喜的佳聯元朗,新季主教練改由陳文俊出任,雖有多名主力離隊,但同時補充了數名具經驗的球員,如曾至孝、黎厚希、祖連奴等。

相隔一季再效力元朗的祖連奴獲「陳Sir」激讚:「佢好快融入到球隊,喺前線配合、逼搶都幫到手,會係重要一員。我哋有6個外援,出邊4個好視乎對手係邊隊,但我認為祖連奴會係攻擊線上優先考慮嘅一個。」


on.cc東網App - 新聞全港最多、更新速度快,集合圖文影片,睇新聞至全面。

ontv東網電視 - 東方報業集團24小時免費網上電視,全天候製作第一手新聞、財經、娛樂、生活、評論等節目及短片,隨時隨地即睇即知!





































































你可能還想看