【渣打香港馬拉松.專訪】「零零後」新星的第一次 梁德洋黃卓寧初試啼聲

【體路專訪】渣打香港馬拉松2021曲終人散,但對兩位「零零後」新星梁德洋和黃卓寧而言,長跑之路才剛開始,前者今屆於男子半馬組摘季,以1小時10分26秒刷新香港青年紀錄;後者於初馬一擊即中,跑出2小時43分17秒奪亞,為長跑生涯打下強心針。

凡事總有第一次,面對前路的未知,有人畏手畏腳,有人迎難而上。21歲的香港中文大學健康與體育運動科學教育學士三年級生黃卓寧,讀中學時主練籃球,更為學界「長勝軍」協恩中學的主力,後來她兼練長跑創出一片新天地,先後打破香港女子半馬拉松(1小時21分26秒)及10000米(37分16秒12)的青年紀錄。

雖然她於長跑潛力盡顯,惟從未參加全馬,今年8月香港田徑總會宣佈渣馬落實於10月重開,即使備戰時間很短,黃卓寧花了3個小時思考就決心報名要一戰全馬,「我一路都想搏去2022年亞運,但我冇馬拉松成績,所以想試。我知道渣馬條路好辛苦,如果第一次跑得差會有心理陰影,不過可見未來都無咩機會可以出外地跑,所以決定點都要試。」由報名起黃卓寧只得九星期備戰,時間倉卒,練習長課機會不多,但今次參賽目標明確,旨在達到港隊2小時49分的精英級別培訓門檻,心態積極,訓練事半功倍,「我之前喺樽頸位好耐,有咗目標之後練習變得好有火,搵到自己有咩想做。」最後黃卓寧亦成功達到體院精英項目的標準。

相對黃卓寧的專心致志,渣馬場上另一令人動容的畫面,是19歲小將梁德洋在男子半馬組以第3名衝線後,獲在他之前衝線的冠、亞軍跑手陳家豪和紀嘉文擁抱鼓勵。賽後三人接受傳媒採訪時,已屆37歲的陳家豪和紀嘉文更刻意把中間位置讓予梁德洋,希望香港長跑界有人接棒。

然而梁德洋今次渣馬備戰過程卻屢遇阻滯,他曾三次報名參加渣馬,惜年年未能中籤,今年終於入圍,一心衝擊由謝俊賢保持的1小時11分44秒青年紀錄,但因來年應考DSE,要兼顧學業和訓練,賽前甚至絞肚痛,感覺力不從心,「我練得好差,因為DSE令自己休息唔係咁好,形成咗一個惡性循環,唔敢奢求太多。」梁德洋憶述開賽一刻,心中仍然十五十六,但起跑後他緊跟長跑前輩陳家豪及紀嘉文等身後,越跑越順,雖然跑入西隧後被拋離,但最後直路沿途獲支持者打氣,為他注入能量,「臨尾我都唔望錶喇,衝埋佢,同埋又見到教練同朋友打氣,嗌我個名,聽到聲個人即刻有動力。」

梁德洋(中)於渣馬衝線後,獲亞軍紀嘉文(左)和冠軍陳家豪上前擁抱鼓勵。(圖:體路資料庫)
梁德洋(中)於渣馬衝線後,獲亞軍紀嘉文(左)和冠軍陳家豪上前擁抱鼓勵。(圖:體路資料庫)

談起跑渣馬的過程,兩人皆特別提及被一眾跑手視為畏途的西隧,黃卓寧說:「起跑時覺得冇嘢好輸,所以冇乜壓力,開得幾順,不過上昂船洲大橋時好斜,冇預計過咁長,隻腳有少少抽筋,開始跟甩前面嘅跑手。」當刻她減速調整讓肌肉放鬆,跑至長青隧道已回復正常,不過跑出西隧後又體力開始不支,「上完西隧斜我迷迷地,唔係好掂,我望錶仲有幾公里,諗緊如果『爆偈』去到5分鐘配速,計數都仲達到目標,所以都算放心。」每逢比賽,黃卓寧腦海中會不斷浮現「Stay focus」(保持專注)二字提醒自己,臨尾「頂住」跑入維園,衝線後體力旋即耗盡,她笑說:「一停低個腦就熄咗機,要用意志叫自己企起身行。」梁德洋在旁聞言即連連點頭認同西隧的可怕,謂賽前學校老師千叮萬囑他賽後翌日別要請假,他自嘲第二天從碌架床落床準備上學時,雙腿痛得似「落地獄」。

梁德洋的背包上掛著這個匙扣,時刻提醒自己。
梁德洋的背包上掛著這個匙扣,時刻提醒自己。

賽後身體的痛,正是賽場上全力以赴的憑據,今次渣馬二人同創佳績,黃卓寧認為是次表現為日後征途打下一支強心針,冀明年能於世大運、甚至亞運更上一層樓,未來更願望能躋身奧運,「我覺得原來我這個年紀都做到(成績),我仲有好多進步空間,可以再畀多啲時間,放膽再試,睇下之後兩年嘅進步有幾多,去到2024年巴黎奧運都係23歲,又可以再衝擊多一屆去到2028年。」

梁德洋克服重重困難,如願刷新香港青年紀錄,他指DSE臨近,年底就會閉關溫習,預計公開試前會避戰,但這位小將已立下宏願,深信假以時日,能追上前輩腳步,「畀兩年時間我練得好,香港紀錄或者去亞運都可以,因為我呢幾年練得好少里數,但都練得唔差,如果再畀多啲休息時間我,我覺得有機會。」長江後浪推前浪,一代又一代舊人漸漸退去,獲得姚潔貞、陳家豪、紀嘉文盛讚的兩人,且看新一代能否接過衣缽,再上高峰。

圖、文:洪量丰

此篇文章由「體路 Sportsroad」最初發表於「【渣打香港馬拉松.專訪】「零零後」新星的第一次 梁德洋黃卓寧初試啼聲