【泰版流星花園】19年來全球7套改編版 最騎呢F4 最靚杉菜係……

最近泰國喺香港大熱，BL題材嘅《只因我們天生一對》（2gether）更加捧紅男主角Bright（Vachirawit Chivaaree）同Win（Metawin Opas-Iamkajorn ）。呢頭先睇完佢兩個談情說愛，但係新劇泰版《流星花園》就安排Bright 同Win演道明寺同西門，如果跟返原著漫畫《花樣男子》劇情，似乎好難令Bright 同Win「愛火重燃」，難怪令粉絲們大為不滿！

《流星花園》嘅故事同角色設定，實在太適合拍偶像劇，所以自從2001年台灣版取得空前成功之後，多個地方都重拍再重拍，不過要演F4同杉菜外型好緊要，選角出事盞變成鬧劇！

泰國版

播放2gether嘅頻道GMM宣布開拍《流星花園》之後，除咗BrightWin二人角色安排備受fans爭議，另一話題就係杉菜一角由新人Ton Tawan飾演，有劇迷認為唔夠靚，亦有人認為根本杉菜嘅吸引力唔喺外表，而Ton就有杉菜倔強嘅氣質。而其餘嘅F4成員花澤類同美作，就由新人Dew及Nani飾演。

台灣版

可以話係開創偶像劇風潮嘅力作，F4分別由言承旭、周渝民、吳建豪同朱孝天飾演，而大S徐熙媛就係女主角杉菜人選。呢個版本紅遍亞洲，製作人柴智屏估計有5億人睇過，連華語市場外嘅菲律賓、印尼、泰國都好buy呢隊F4。

日本版

原著係大熱日漫，1997年拍成電影版，但劇集要到2005年先出街，可能係見台版收得先拍板開工。比起台版，日版F4陣容可謂最具人氣，淨係由當時得令嘅Arashi成員松本潤演道明寺已經嘩聲四起，上位嘅小栗旬同松田翔太分別演花澤同西門，飾演美作係中日混血兒阿部力。杉菜由童星出身嘅井上真央孭飛。早幾年有傳TBS想再拍《花樣男子》，並且由廣瀨綾演杉菜，後來原作者喺twitter否認。

韓國版

論造型同選角氣質，韓版F4最貼近原著。有網民話，呢隊F4除咗李敏鎬之外，其餘人物之後發展都麻麻，金賢重因為同女友嘅糾紛而人氣不再，其餘嘅金汎同金俊都未能承接劇集人氣。而演杉菜嘅具惠善本來發展唔錯，可惜近年受同前夫安宰賢嘅是非困擾而宣布退出。

中國版

2009年嘅《一起來看流星雨》由鄭爽、俞灝明主演，製作單位強調係原創，不過事前宣傳劇組就話係「中國版《花樣男子》」，而劇情以至人物設定都同《花樣男子》相似，被指係山寨版。到前年台版《流星花園》製作人柴智屏親自操刀出品正式國產版本，一擲千金去英國拍攝，甚至搵第一代杉菜大S個妹小S（徐熙娣）演道明寺家姐！由於同樣華語版本，難免被觀眾狠批，尤其是鬧植入廣告太多，演杉菜嘅沈月俾人鬧到體無完膚。

印尼版

網上流傳越南版嘅「岩巉F4」原來只係惡搞，同屬東南亞嘅印尼就有套名叫Siapa Takut Jatuh Cinta嘅劇集，故事同《流星花園》好相似，但係一拍就拍咗四百幾集。印尼版F4都係由十幾廿歲年青演員飾演，有一陣其他版本都冇嘅「0靚仔除」。

美國版

平時睇美劇，大場面大陣仗劇本又鬼咁多鋪排，估唔到呢套美劇版《流星花園》被網友狠狠劣評。IMDB上得分只有3.1，演員冇星味唔吸引，仲將設定改到亂七八糟︰杉菜變成紋身街舞少女，道明寺老豆係黑社會，本來有得打NBA但係自己拒絕咗！而且製作粗劣，真係好值得一睇呀！