【楊明攻守戰】拖楊明辣著正印莊思明 「情敵」許芯悅是誰?

參演電影《時代》嘅女藝人許芯悅(Katie),早前自爆同戲中拍檔楊明有拖手戲,楊明女友莊思明親自監場仲睇到實。前日許芯悅出席活動時突然爆喊,話提及莊思明嘅新聞出街之後,收到人身攻擊嘅訊息,仲聲稱「有人叫我唔好再講」。

那邊廂嘅莊思明就喺IG隔空反擊,話「預咗啲講開大話嘅人係唔會咁容易收手架啦!你要繼續老屈作故仔博見報你咪繼續囉,公道自在人心!」,又暗寸「你再講大話小心變咗木偶鼻」。

30歲嘅許芯悅入行11年,代表作可能係拍過《怪談︰6魔女》,同埋電影《生前必做 •七件事》。近年出現過喺Viu TV節目《慳啲啦!HONEY!》同埋《脫獨工程》,以及參演舞台劇。今年初許芯悅去到東京報讀巴黎藍帶廚藝學校烘焙文憑,之後返香港開youtube channel教煮食。

許芯悅曾經考入北京中央戲劇學院報讀短期課程,佢話上完堂之後演戲變得更得心應手,進入情緒快咗好多,要喊可以即刻喊。咦,嗰日見記者佢又真係講咗幾句就爆喊喎。